Tryggði sér sigur á heima­velli með því að skutla sér í mark

Norðmenn bundu náttúrulega vonir til þess að þeirra besta fólk næði að tryggja sér sigur á heimavelli á stærsta frjálsíþróttamóti ársins í Noregi.

Ein af vonarstjörnum þeirra var millivegahlauparinn Jakob A. Ingebrigtsen.

Ingebrigtsen náði að vinna 1500 metra hlaupið í gær en hann þurfti að beita sérstökum aðferðum til þess.

Hann tryggði sér sigur á heimavelli með því hreinlega að skutla sér í mark.

Með því komst hann fram úr Keníamanninum Timothy Cheruiyot.

Ingebrigtsen fékk tímann 3:29.74 mín. en Cheruiyot var skráður með tímann 3:29.77. Sigurtími þessa norska var besti tími ársins til þessa.

Ingebrigtsen hafði verið með forystuna nær allt hlaupið en á síðustu fimmtíu metrunum leit út fyrir að Cheruiyot ætlaði að stela sigrinum.

Ingebrigtsen átti lokaorðið með því að koma láréttur yfir marklínuna.