Upp­lifði mar­tröð fegurðar­drottningarinnar

Örfáum klukkustundum áður en lokaæfingin átti að hefast kom í ljós að síðkjóllinn sem Lilja Sif hugðist klæðast á sviðinu var horfin. 

„Þetta var alveg hræðilegt því þessi forkeppni er mikilvægust. Þar velja dómararnir hverjar komast áfram á laugardaginn. Í forkeppninni fá allar stúlkurnar að ganga í síðkjólum en á laugardaginn eru það bara þær sem komast í úrslitin að stíga á svið í síðkjól. Þetta var því mikilvægasta mómentið mitt á sviðinu.“

Fjaðrafok og dauðaleit

Lilja Sif útskýrir að venjan sé sú að starfsfólk á vegum keppninnar safni alltaf saman kjólum allra keppenda og passi að þeir séu rétt gufaðir og allt sé í lagi með þá.

„Auðvitað treystir maður því bara. Þegar í ljós kom að kjóllinn minn væri týndur upphófst skiljanlega mikið fjaðrafok og gerð var dauðaleit að kjólnum. 

Ég var búin að nota alla aðra síðkjóla sem ég tók með mér út á ýmiskonar viðburði og skemmtanir þar sem teknar höfðu verið myndir. Það er leiðinlegt að stíga á svið í kjól sem ég hafði komið áður opinberlega fram í.“

Blautur og blettóttur

Eftir gríðarlega leit var ljóst að tíminn væri runninn út og stelpurnar yrðu að halda af stað frá hótelinu yfir í keppnishöllina. En hún er staðsett í langri fjarlægð frá hótelinu. Kjóllinn kom svo loksins í leitirnar en honum hafði verið komið fyrir í svörtum fatapoka. Af einhverjum óskiljanlegum ástæðum hafði fatapokinn blotað og kjóllinn allur út ataður í svörtum blettum. 

„Vissulega hefur maður hugsað, var einhver þarna að verki því svona á ekki að geta gerst. Þarna á allt að vera upp á tíu og allt í einu er þessi vökvi kominn og blettir í flíkina en það er ekkert sem hægt er að fullyrða þetta eru bara getgátur. 

Það var tekin ákvörðun að senda kjólinn beint í hreinsun og eðlilega ekki mælt með því að ég myndi klæðast honum svona blettóttum á sviðinu.“

Auka álag á taugnarnar

Í kjölfarið var Lilju útvegaður kjóll sem hún segist ekki vita hver hafi átt en eflaust hafi hann verið í eigu keppninnar. Hann var þó ekkert í líkingu við upphaflega kjólinn og passaði ekki alveg. 

„Ég hafði aldrei æft mig í þessum kjól og allar pósurnar sem ég hafði planað að gera í hinum gengu ekki upp í þessum. Ég þurfti því á mjög skömmum tíma að æfa allt upp á nýtt. Þegar maður er að velja sér kjól fyrir svona kvöld fer maður alveg all in og eins og sjá má frá myndum af kvöldinu eru stelpurnar allar í mjög afgerandi glitrandi kjólum og kjóllinn sem ég ætlaði að vera í var miklu meira statement heldur en kjóllinn sem ég gekk síðan í. 

Þetta var auka álag á taugarnar en ég vil trúa því að ég hafi staðið mig vel. Við sjáum svo á morgun hvort það skili mér í úrslitin og ég fái þá að stíga á svið í upphaflega kjólnum.“

Áhugasamir geta horft á keppnina sem fer fram á morgun, 18. nóvember hér fyrir neðan.