Ákvað að börnin myndu ekki missa mömmu sína líka

Haraldur lést af slysförum þegar eldur kom upp á heimili þeirra hjóna á Tenerife í febrúar fyrra. 

„Ég ákvað strax að börnin mín myndu ekki missa mömmu sína líka þennan dag og hef ég því gert allt sem ég get til að halda lífi okkar eins líku því og það var áður. Það er náttúrulega engan veginn eins, þar sem bæði pabbi þeirra og heimilið okkar fór samdægurs en þau allavega misstu mig ekki eins og vel getur gerst þegar sorgin heltekur fólk,“ segir Drífa í samtali við Vísi. 

Hún trúir því að í kjölfar erfiðis komi eitthvað gott á móti.

„Hugurinn ber mann hálfa leið hvort sem það er í áttina að því góða eða því slæma, ég trúi á það góða svo ég hlýt að fá það.“

Drífa og Haraldur eignuðust tvö börn saman, Harald Loga Jr. og Björk Linnet. Fyrir átti Drífa dótturina Söru Jasmín. 

Að sögn Drífu lítur hún björtum augum til framtíðar. Hún er með skemmtileg verkefni á teikniborðinu.

„Það hefur aldrei neitt annað komið til greina en að eiga gott og innihaldsríkt líf alltaf. Sama hvaða verkefni lífið réttir manni,“ segir Drífa auðmjúk

 „Ég bjartsýn og jákvæð að eðlisfari. það getur komið manni langt.“

Afmælisveisla í anda Halla

Halli hefði orðið 51 árs 23. ágúst síðastliðinn. Í tilefni dagsins fagnaði fjölskyldan deginum, í hans anda, með rauðvíni og steik. 

„Við fórum út að borða í Hafnarfirði, heimabænum hans, á Krydd veitingahúsi. Staðurinn var í miklu uppáhaldi hjá honum. Mamma mín, Anna Árnadóttir, sem reyndist honum alltaf sem móðir, kom með okkur,“ segir Drífa og bætir við:

„Halli og mamma voru mjög náin og áttu fallegt samband. Ég er ótrúlega þakklát fyrir það. Hún hefur staðið við bakið á mér og krökkunum sem klettur og er með okkur öllum stundum.“

Aðspurð segist Drífa vera óákveðin hvar hún vilji skjóta niður rótum. Sem stendur er fjölskyldan á flakki milli Íslands og Spánar. 

Lífið of stutt fyrir leiðindi

Drífa minntist Halla og tímanna þeirra saman í einlægri færslu á samfélagsmiðlum í tilefni dagsins. Hún lýsir sambandi þeirra sem fallegu og drama lausu.

„Ég var að skoða persónuleg samskipti á milli okkar og gamlar afmæliskveðjur og ég er svo þakklát fyrir hvað ég var dugleg að segja beint við hann hvað ég var þakklát og sjúk í hann alla daga. Samskipti okkar voru alltaf dramalaus og falleg og börnin okkar búa að því alla ævi að svona eigi samskipti milli hjóna að vera,“ segir í færslunni. 

Að sögn Drífu hafi Halli verið besti maður sem hún hafi kynnst. Enginn sé fulkominn en Halli hafi komist nálægt því.

„Rifrildi og drama eru svo mikill orkuþjófur og óþarfi að það er engum hollt að búa í svoleiðis umhverfi. Stjórnsemi er líka eitruð og allir einstaklingar verða að fá að hafa sýna vængi. Afbrýðisemi er óþolandi og fýlustjórnun og mislyndi er vægast sagt ósjarmerandi. Ekkert af þessu hrjáði Halla svo gangi mér vel bara,“ segir í færslunni.

Drífa biðlar til annarra hjóna að venja sig á falleg samskipti. Fyrir sambandið og börnin.

Færsluna má lesa í heild sinni hér að neðan: