Kasólétt Tia-Clair Toomey reyndi við 23.1

Hin ástralska Tia-Clair Toomey hefur unnið sex heimsmeistaratitla í röð í CrossFit en verður ekki með í ár af því að hún er ólétt af sínu fyrsta barni.

Það stoppaði þó ekki þessa miklu íþróttakonu að reyna sig við fyrstu æfingu á The Open í ár.

Í æfingunni á íþróttafólkið að gera eins margar endurtekningar og þau geta á fjórtán mínútum með því að eyða sextíu kalóríum í róðrarvélinni, gera fimmtíu endurtekningar af tám upp í stöng, henda 6,3 kílóa boltum fjörutíu sinnum í vegg, gera þrjátíu frívendingar með 43 kílóa stöng og enda á tuttugu upplyftingum í hringjum.

Toomey náði 180 endurtekningum í ár en sagðist hafa náð 187 endurtekningum þegar þessi sama æfinga var í opna hlutanum árið 2014.

Toomey viðurkenndi þó að hafa sleppt upplyftingum í hringjum (Ring Muscle Ups) og skiljanlega enda er það erfiður endakafli og stórhættulegt fyrir ófríska konu ef hún skildi missa takið.

Tia-Clair sagði líka hafa átt í smá erfiðleikum með því að sparka tánum upp í stöngina enda ekki auðveldasta hreyfingin fyrir kasólétta konu.

Hér fyrir neðan má sjá myndband af Tiu-Clair Toomey að gera æfingarnar sínar.