Kvartar undan tekjutapi Twitter

Musk tísti í dag og sagði að aðgerðasinnar hefðu beitt auglýsendur þrýstingi og sagði það þrátt fyrir að engar breytingar hefðu verið gerðar á ritstjórn samfélagsmiðilsins og að „við gerðum allt sem gátum til að friða aðgerðasinnana.“

Auðjöfurinn sagði þetta ömurlegt og bætti við: „Þau eru að reyna að ganga frá málfrelsi í Bandaríkjunum.“

Í frétt Wall Street Journal segir að forsvarsmenn stórra fyrirtækja eins og General Mills, Mondelez International og Pfizer hafi tekið þá ákvörðun að hætta tímabundið að auglýsa á Twitter í kjölfar yfirtöku Musks.

Auðjöfurinn hefur lagt mikið púður í það að leita að nýjum tekjulindum fyrir Twitter og hefur meðal annars komið til greina að bjóða uppá áskriftarþjónustu þar sem notendur myndu greiða átta dali á mánuði. Musk segir að áskrifendur muni frá blátt merki við nafn sitt, forgang í leitarvél Twitter og samræðum, færri auglýsingar og geta birt lengri myndbönd og hljóðbúta.

Musk keypti fyrirtækið á 44 milljarða dala. Fyrirtækið tók á sig miklar skuldir við yfirtökuna. Greinendur segja að vaxtagreiðslur Twitter muni vegna þessara skulda fara úr um fimmtíu milljónum dala í fyrra, í um milljarð dala á næsta ári.

Sjá einnig: Musk leitar nýrra tekjulinda fyrir Twitter

Þessar hugmyndir Musks hafa vakið spurningar um framkvæmd og þá sérstaklega það hvort notendur geti þóst vera hver sem er á Twitter og jafnvel hvort ríkisstjórnir geti opnað áskriftarreikninga á Twitter til að dreifa áróðri í forgangi í leitarvél miðilsins og samræðum, eins og Musk hefur gefið til kynna.

Musk hefur sagt að hann hafi keypt Twitter með framtíð mannkyns í huga og að hann vilji ýta undir málfrelsi. Hann hefur lengi verið gagnrýninn á ritstjórn Twitter en í kjölfar yfirtöku hans hafa rasistar og tröll nýtt tækifærið til að básúna hatursfullum ummælum á Twitter.

Sjá einnig: Rasistar og tröll nýta sér tækifærið á Twitter

Um 7.500 manns unnu hjá Twitter í byrjun árs en stór hluti þeirra starfsmanna hefur staðið frammi fyrir því að vera sagt upp störfum í dag. Þegar þetta er skrifað eru byrjaðar að berast fregnir af uppsögnum hjá Twitter.

Meðal annars er Musk sagður hafa sagt upp öllum starfsmönnum Twitter sem hafa unnið gegn falsfréttum og upplýsingaóreiðu á samfélagsmiðlinum.