„Leyfa sér að vera berskjaldaður, treysta og þar með upplifa ástina“

Zoë og Gunnur kynntust árið 2019 í tónlistarskóla FÍH þar sem þær lærðu saman rytmískan söng. Þær komust í úrslit Músíktilrauna 2021 með hljómsveitinni ÆSU. Þetta er annað lagið sem þær gefa út saman, en þær sendu frá sér lagið Jólin heima í desember síðastliðnum. Blaðamaður tók púlsinn á þessum tónlistarkonum.

Leikum okkur við að henda fram hugmyndum

„Við sömdum lagið í session-i, þar sem við sitjum vanalega tvær saman og leikum okkur við að henda fram hugmyndum. Þetta var eitt af nokkrum lögum sem urðu til, en okkur líkaði vel við þessa hugmynd og ákváðum að vinna meira með hana,“ segir Gunnur um það hvernig lagið varð til.

Zoë Vala bætir við: „Mig langaði til þess að semja hresst lag, því, án þess að hljóma deprímerandi, fram að því hafði mér þótt það erfitt og finnst mun auðveldara að semja ballöður þegar ég er ein á píanóinu. En þegar við Gunnur erum að semja saman á gítar gengur þetta betur. Gunnur lagði hljóma á gítarinn og svo söngluðum við laglínur yfir.“

Þær Zoë og Gunnur búa yfir mikilli reynslu í tónlistinni og hafa ásamt náminu í FÍH sótt áhugaverð námskeið.

„Við vorum búnar að vera á textasmíðar námskeiði hjá Maríu Magnúsdóttur og reyndum að nota tæknina sem við lærðum þar við textasmíðina en þetta var okkar fyrsta tilraun með þessa tækni,“ segir Gunnur.

Samsetning af tilfinningum

„Við byrjuðum á einni minningu úr fyrra ástarsambandi mínu og orðinu sjór og unnum svo með myndlíkingar og orð tengd sjónum til þess að fjalla um þá minningu. Textinn er meira og minna samsetning af tilfinningum sem passa við laglínuna og sjóinn. 

Lagið fjallar um að leyfa sér að vera berskjaldaður, þora að treysta, og þar með leyfa sér að upplifa ástina og allt það skemmtilega sem hún getur haft í för með sér,“ 

segir Zoë.

Úrvalslið hljóðfæraleikara

Úrvalslið hljóðfæraleikara spilar í laginu Baby The Ocean og eru það tónlistarmenn sem stelpurnar kynntust í gegnum FÍH. Ari Bragi Kárason spilar á trompet, Kári Haraldsson á píanó, Andrés Þór Gunnlaugsson á gítar, Sigmar Þór Matthíasson á bassa og Hinrik Þór Þórisson á trommur. Lagið er svo pródúserað af Stefáni Erni Gunnlaugssyni hjá Stúdíó Bambus.

„Hinrik Þór og Kári eru góðir vinir okkar úr FÍH/MÍT, og algjörir snillingar. Við vorum heppnar og mjög spenntar að fá þá með í verkefnið,“ segir Gunnur og Zoë bætir við að í kjölfarið hafi þær ákveðið að slá til og heyra í Sigmari, Andrési Þór og Ara Braga.

„Allir eru þeir tónlistarmenn sem við lítum mikið upp til og stór nöfn í íslensku tónlistarsenunni, en á þeim tíma þekktum við þá ekki persónulega. Það borgaði sig greinilega að hafa kjarkinn til þess að spyrja!“

Heklað plötuumslag

Að lokum fóru þær með lagið til Stebba í Stúdíó Bambus og segja stelpurnar hann hæfileikaríkan og að virkilega skemmtilegt sé að vinna með honum.

„Hann sá um pródúseringu og upptökur og hjálpaði við útsetningu. Hann tók lagið upp á næsta level.“

Halla Lilja Ármannsdóttir, nýútskrifaður prjónahönnuður úr London College of Fashion, hannaði plötuumslagið. Verkið er heklað og var hannað með innblæstri frá náttúrunni í kringum sjóinn.

„Okkur þótti gaman að nýta textíl í öðru formi og fara aðeins út fyrir kassann, segir Zoë að lokum.“