Fékk barnið á heimilið 42 mínútum eftir að fá símtalið í Byko

„Í einu af mínum tilfellum, þegar ég var í Byko, þá 42 mínútum seinna þá hitti ég barnið. Þá var það komið í andyrið og okkar vegferð hófst saman.“

Í flestum tilfellum fær fólk samt lengri umhugsunarfrest og samtal við félagsráðgjafa þar sem þau skrifa undir trúnaðaryfirlýsingu og fleira áður en það hittir barnið. 

„Fáum smá tíma til að máta okkur. Það skiptir máli að fá að sjá barnið, fá að raungera það,“ útskýrir Hildur.

„Ég held að það sé það fyrsta sem maður hugsar, hvernig er það? Manni langar svo að sjá það,“ bætir María Dröfn Egilsdóttir við.  Guðlaugur Kristmundsson man enn eftir fyrstu dögunum eftir að hann fékk símtalið mikilvæga.

„Alla helgina hugsaði ég, hvernig hlær barnið? Hvernig hljóð gefur það frá sér? Hvernig mun það fylla rýmið mitt með hljóðum?“

Hægt er að hlusta á þáttinn í heild sinni í spilaranum hér fyrir neðan.

Í þessum fimmta þætti hlaðvarpsins Fósturfjölskyldur ræða þau Guðlaugur, Maja og Hildur um fósturbarnið og kynfjölskylduna. Þau ræða fyrstu kynni við fósturbarnið og það hvenær barnið flytur svo inn. Einnig velta þau fyrir sér hvenær og hvernig má tilkynna að nýtt barn sé komið inn á heimilið. Þá velta þau upp spurningunni hvort allir fósturforeldrar passi við öll fósturbörn? 

Félagsráðgjafar spila stórt hlutverk í lífi fósturbarna og oft í lífi fósturfjölskyldunnar. Félagsráðgjafinn er oft mikilvægasti hlekkurinn til að deila sögu barnsins og að veita nýrri fjölskyldu skilning og stuðning sem barnið þarf. Hvernig verður sambandið við þetta fólk og hvernig tengja börnin þau við sitt líf? 

Þau Gulli, Hildur og Maja ræða einnig umgengni við kynforeldra fósturbarna og fara yfir áhrifin sem það getur haft, bæði á barnið og þau sjálf sem aðal umönnunaraðila og sérfræðinga í lífi barnsins. Hvernig líður barninu og hvaða áhrif hefur það á fjölskyldulífið? Hvað gerist svo þegar barnið verður 18 ára?