99 sm urriði í vorveiðinni í Ytri Rangá

Ytri Rangá hefur lengi verið ein af vinsælustu laxveiðiám landsins en það vita kannski ekki allir að í henni er líka stór og flottur urriði í ánni.

Það hefur verið nokkur ásókn erlendra veiðimanna í vorveiðina sem og silungsveiðina í Ytri rangá á vorin enda fyrirfinnst þar stofn af staðbundnum urriða sem getur orðið feyknastór. Fyrsti urriðinn sem veiðist á þessu ári á svæðinu var heldur engin smásmíði eða 99 sm og við höfum ekki ennþá heyrt af jafn stórum fiski á þessu veiðitímabili en það eru bara komnir þrír dagar svo við skulum bara bíða róleg.

Það var Jóhannes Guðlaugsson sem veiddi þennan flotta urriða við Húsabakka og tók hann tinsel flugu. Ytri Rangá hefur einnig sterkan stofn af staðbundnum urriða á efri svæðunum í ánni eða fyrir ofan Árbæjarfoss en síðan er oftar en ekki mikið af sjóbirting í ánni alveg frá Ægissíðufossi og niður að Borg á vorin og þarna má oft sjá sjóbirtinga sem eru að teygja sig vel í meterinn.