RAX Augnablik: „Þetta var falleg vinátta manns og hunds“

RAX fann það strax að það væri eitthvað einstakt við myndina af vinunum saman í fjörunni og átti hún eftir að hafa mikil áhrif á hans feril sem ljósmyndari.

„Það sem ég hugsaði var að það þarf að skrásetja þetta líf þessa fólks. Þetta mun hverfa, þetta mun breytast. Þannig byrjaði ég raunverulega að mynda markvisst líf fólks á Íslandi, svona út í sveitum og víðar. Þetta augnablik, bara þetta augnablik var eins og einhver kæmi og bankaði í hausinn á þér og segði þetta er það sem þú átt að gera.“

RAX segir að Týri hafi verið sjóveikur svo hann fór aldrei með eiganda sínum á bátnum.

„En hann beið eftir honum á steininum þar til hann kom aftur. Þetta var falleg vinátta manns og hunds.“

Hægt er að horfa á þáttinn í spilaranum hér fyrir neðan. RAX Augnablik eru örþættir og þátturinn Axel á Gjögri er rúmar fjórar mínútur. 

RAX hefur um áratuga skeið myndað einstaklinga eins og Axel, á Íslandi og víða erlendis. Myndirnar hafa birst í bókum hans eins og Andlit norðursins og verið sýndar á ljósmyndasýningum um allan heim. 

Myndin af Axel varð til þess að RAX fór að mynda þetta fólk og tók þá þar á meðal myndina af Guðjóni við Dyrhólaey, eina af þekktustu myndum ljósmyndarans. Hægt er að horfa á RAX Augnablik þáttinn um þá mynd í spilaranum hér fyrir neðan.