Katrín nýr sviðs­stjóri markaðs­mála hjá Men&Mice

Katrín M. Guðjónsdóttir hefur verið ráðin sem nýr sviðsstjóri markaðsmála hjá Men&Mice.

Í tilkynningu segir að um nýja stöðu sé að ræða og að félagið hyggist á markaðsdrifna sókn erlendis, en félagið sérhæfir sig í þróun og sölu hugbúnaðarlausna.

„Katrín er með MBA gráðu frá Háskóla Íslands ásamt BA í markaðsfræði og grafískri hönnun. Katrín hefur um 15 ára reynslu í markaðsmálum, vörumerkjastjórnun og viðskiptaþróun. Áður starfaði Katrín sem framkvæmdastjóri markaðssviðs ALVA og sem markaðsstjóri olíufélaganna, Skeljungs og N1. Hún var markaðsstjóri hjá Innnes auk þess að starfa að markaðsmálum fyrir Símann. Katrín tók þátt í undirbúningi beggja olíufélaganna fyrir skráningu í kauphöll, og vann að mörkunarvinnu og heildarstefnumótun fyrir þau félög sem hún hefur starfað hjá. Katrín situr í stjórn Ímarks og er stjórnarformaður hjá Manino.

Hlutverk Katrínar hjá Men&Mice er að byggja upp nýtt markaðsteymi frá grunni, sækja aukna markaðshlutdeild beggja vegna Atlantshafsins og auka vörumerkjavirði almennt í alþjóðlegu umhverfi,“ segir í tilkynningunni.