Gekk fram á krókódíl sem sat að sumbli

77 ára gömul kona í Flórída-ríki í Bandaríkjunum vaknaði upp við vondan draum aðfaranótt föstudags. Konan, Mary Wischhusen, vaknaði við mikinn hávaða klukkan 3:30 á heimili hennar í bænum Clearwater í Flórída. Sky greinir frá.

Þegar Wischhusen kannaði aðstæður komst hún að því að það sem hún grunaði að væri innbrotsþjófur var í raun og veru 3 metra langur krókódíll á eldhúsgólfinu. Wischhusen segir í samtali við staðarmiðilinn Spectrum News að hún hafi umsvifalaust flúið til baka inn í svefnherbergi, hringt á lögregluna og spilað tölvuleiki til þess að róa taugarnar uns hjálp barst.

Lögreglan í Clearwater hefur birt myndir, myndbönd og hljóðupptökur frá heimili Wischhusen. Þar sést að krókódíllinn hafði brotist inn um rúðu, komið sér vel fyrir og brotið rauðvínsflöskur heimilisins. Lá krókódíllin þar á eldhúsgólfinu, baðaður í rauðvíni.

We know you've been chomping at the bit for more visuals from today's alligator trespassing in Clearwater The male alligator was 10 to 11 feet in length. During the apprehension, the alligator knocked over several bottles of wine. The red liquid in the video is wine, not blood. pic.twitter.com/x6ktib6ajl

— Clearwater Police Department (@myclearwaterPD) May 31, 2019

Krókódíllinn hafði skorið sig á gleri og var því færður á krókódílaathvarf til þess að jafna sig áður en honum verður komið fyrir á verndunarsvæði.