Hyggst ekki segja af sér

Ranil Wickremesinghe, forsætisráðherra Srí Lanka, hefur ekki í huga að segja af sér. Þetta sagði hann við BBC í gær. Ítarlega hefur verið fjallað um það undanfarna daga að srílanska leyniþjónustan fékk upplýsingar um að hryðjuverkaárásir gætu verið yfirvofandi. Upplýsingarnar komust ekki til stjórnvalda og svo fór að um 250 fórust í árásum á páskadag.

Nú þegar hefur varnarmálaráðherra sagt af sér vegna málsins. Srí­lanskir stjórnmálamenn hafa sagt að ef upplýsingarnar hefðu komist á réttan stað hefði mögulega verið hægt að koma í veg fyrir árásirnar eða takmarka skaðann.

„Ef við hefðum haft einhverja hugmynd en ekki gert neitt í málinu þá hefði ég sagt af mér tafarlaust. En hvað á maður að gera þegar maður fær ekki neinar upplýsingar?“ spurði Wickremesingje í viðtalinu.

Maithripala Sirisena forseti greindi frá því í gær að Zahran Hashim,­ öfgafullur predikari og meintur höfuðpaur árásanna, hafi látist er hann gerði árás á Shangri-La hótelið í Colombo.