Nýja línan er inn­blásin af drauma­heiminum

Nýjasta lína fatahönnuðarins Hildar Yeoman var að koma í sölu en línan var frumsýnd í sumar á Listahátíð við góðar undirtektir.

Hildur segir þessa nýju línu vera nokkuð frábrugðna eldri línum en í henni leynast meðal annars kápur, kjólar og hátíðlegt skart.

Það er alltaf jafn mikil spenna sem fylgir því að taka upp nýju línu að sögn Hildar enda liggur mikil vinna að baki nýrri línu.

„Það er alltaf mikil tilhlökkun og spenna sem fylgir þessu, ég verð eins og lítill krakki á jólunum þegar ég tek upp sendingar enda er ég þá oft loksins að taka upp draumakjólinn fyrir mig sjálfa. Þetta er gríðarlega mikil vinna, en ég hef mikinn áhuga á því sem ég er að gera og eldmóðurinn drífur mig áfram,“ segir Hildur sem á tíu ára útskriftarafmæli um þessar mundir.

Hún lærði fatahönnun í Listaháskóla Íslands. Aðspurð hvað sé það skemmtilegasta við að vera í fatahönnunarbransanum hefur Hildur svör á reiðum höndum. 

„Fólkið sem er í þessum bransa er svo skemmtilegt, ég er að vinna með mörgum af mínum bestu vinum. Einnig er fjölbreytnin frábær, það eru engir tveir dagar eins.“

Hildur segir nýjustu línu sína vera nokkuð frábrugðna fyrri línum.

„Þetta er nýr heimur sem ég er að vinna með, draumaheimurinn. Eins eru þetta ný snið, ný prent og ný efni, svo sem prentuð ullarefni, glimmerefni og plíseruð pils úr pvc-efni svo eitthvað sé nefnt. Svo bjó ég til nýjar týpur af skarti sem henta vel fyrir hátíðarnar,“ segir Hildur um þessa nýju fjölbreyttu línu.

„Þema línunnar var staðurinn á milli svefns og vöku. Transcendence er augnablikið þegar þú stendur á brún ímyndunaraflsins og lygnir aftur augunum og lætur þig líða inn á lendur hins óraunverulega. Bæði fannst mér þetta spennandi ástand til að rannsaka og svo er tíska í mínum huga mikill draumaheimur, svo það lá beint við að ég skoðaði þetta fyrirbæri sem við könnumst svo vel við,“ útskýrir Hildur.

Playing hide and seek in the Bohemian dress . #photography @sagasig #mua @nataliehamzehpour #model @hannarakelb #bohemian #bohemianstyle #hideandseek #transcendence #dreamers #maxidress #hilduryeoman #beautiful #iceland Opið i Kiosk við Laugaveg frá 10-22

A photo posted by Hilduryeoman (@hilduryeoman) on Dec 22, 2016 at 1:01am PST

Það sem einkennir nýju línuna er fallegt prent sem Hildur vann með hjálp seiðkonu. „Ég fékk aðstoð frá seiðkonu við að búa til seið sem eykur draumfarir og vann mikið af prentum út frá þessum seið,“ segir Hildur, sem hefur áður unnið út frá seið á þennan hátt.

Áhugasömum er bent á að fylgjast með Hildi á Instagram undir notendanafninu hilduryeoman. Þar er Hildur dugleg að birta myndir af þeim margvíslegu verkefnum sem hún tekur sér fyrir hendur.

The Pleated PVC skirts are so nice to dance in #pleatedskirt #pleats #dance #swing #editorial #transcendence #photography @sagasig #mua @fridamariamakeup #model @kristinlilja6 @eskimo_model

A photo posted by Hilduryeoman (@hilduryeoman) on Dec 21, 2016 at 3:17am PST