Nýir Audi Q2 og Q5 í París

Nú stendur yfir alþjóðlega bílasýningin í París sem haldin er annað hvert ár. Fyrstu tveir dagarnir voru helgaðir fjölmiðlum en núna er sýningin opin almenningi og stendur hún yfir til 16. október. Á sýningunni er allt það nýjasta og ferskasta í bílaheiminum til sýnis og vörumerki Heklu, Audi, Mitsubishi, Skoda og Volkswagen eru áberandi.

Audi frumsýnir brakandi nýja kynslóð af Audi Q5 og að sjálfsögðu nýjustu viðbót Q-fjölskyldunnar, Audi Q2, sem beðið hefur verið með óþreyju. Að auki kynnir Audi nýjan og glæsilegan S5 Sportback til sögunnar ásamt Audi RS 3 sedan.

Hjá Skoda er Kodiaq jeppinn í aðalhlutverki en hann er fyrsti jeppinn frá Skoda í fullri stærð. Skoda Kodiaq hefur hlotið mikið lof fyrir tilfinningaþrungna hönnun, nýsköpun í tæknilausnum og stærsta farangursrýmið í sínum flokki. Með tilkomu Kodiaq stígur Skoda sín fyrstu skref á ört vaxandi jeppamarkaði og mun Kodiaq leiða alþjóðlega jeppaherferð bílaframleiðandans.

Mitsubishi er leiðandi þegar kemur að vistvænum fararkostum og teflir fram Ground Tourer PHEV hugmyndabílnum sem byggir á háþróuðu tengiltvinnkerfi frá Mitsubishi og rafmagnsbílnum Mitsubishi eX Concept. Volkswagen er einnig á vistvænum nótum og heimsfrumsýnir nýja hugmyndabílinn I.D. I.D. stendur fyrir nýja kynslóð rafmagnsbíla frá Volkswagen með allt að 600 kílómetra drægni og gert er ráð fyrir því að hann komi á markað árið 2020.