Jeep ætlar að smíða lúxusjeppa til höfuðs Range Rover

Jeep hefur hingað til smíðað fremur hráa og grófa jeppa sem ekki eru með háum verðmiða, en nú hefur fyrirtækið hug á að koma inná markaðinn fyrir dýra lúxusjeppa. Mike Manley, forstjóri Jeep hefur staðfest að Jeep vinni nú að þróun slíks jeppa sem fengi líklega nafnið Grand Wagoneer.

Hann mun kosta á bilinu 130-140.000 dollara og eiga margt sameiginlegt með Maserati Levante jeppanum er kemur að íhlutum og undirvagni. Ef þetta háa verð verður á bílnum verður hann dýrari en Range Rover Sport, Porsche Cayenne Turbo, BMW X6M og fleiri aðrir dýrir jeppar sem eru til sölu í dag.

Hvað vélarkosti varðar er ekki ólíklegt að í bílnum verði 3,8 lítra V8 forþjöppudrifna vélin sem finna má í Maserati Levante, sem og 3,0 lítra V6 dísilvél en búast ma´við því að kreist verði meira afl útúr þeim í nýja jeppanum. Núna er dýrasti bíll sem Jeep framleiðir Grand Cherokee SRT sem kostar 65.000 dollara og því gæti um tvöföldun verðs á dýrasta bíl Jeep verða að ræða.

Búast má við þessum dýra jeppa frá Jeep á árið 2018 eða 2019.