Nýtt tímabil að hefjast í íslenskri tónlistarútgáfu

Í dag tilkynntu Sölvi Blöndal og Ólafur Arnalds að þeir væru fyrir hópi manna sem hefðu fest kaup á tónlistarhluta hluta Senu. Þetta eru án efa stærstu tíðindi íslenskrar tónlistarútgáfu síðan Skífan keypti útgáfufyrirtækið Spor af Steinari Berg árið 1998.

Sölvi og Ólafur leiða verkefnið en í hluthafahópnum eru einnig Jón Diðrik Jónsson eigandi Senu, Reynir Harðarson meðstofnandi CCP, Henrik Biering fjárfestir og Sigurjón Sighvatsson kvikmyndagerðaframleiðandi.

En af hverju eru þetta stór tíðindi og hvað þýðir þetta fyrir íslenska tónlistarútgáfu? Jú, því þetta þýðir að hið nýja útgáfufyrirtæki, sem enn er nafnlaust, mun eiga réttindin af svo stórum hluta íslenskrar tónlistarútgáfu að það tæki styttri tíma að telja upp hvaða plötur eða höfundarverk eru ekki nú komnar undir stjórn og umsjón Sölva og Ólafs.

Áhersla á að auka streymi á íslenskri tónlist

Á blaðamannafundi sem haldinn var á Húrra í dag sögðust þeir ætla að leggja áherslu á streymishluta útgáfunnar. Sölvi og Ólafur ætla að leggja kappi við að starfa með erlendum netveitum til þess að skapa sér íslensk svæði. Auk þess verði lögð áhersla á að gera íslenska tónlist sýnilegri fyrir íslenska notendur í tilraun til þess að fá íslenska notendur slíkra netveita til þess að auka hlustun á íslenska tónlist sem er núna á bilinu 10-15%.

Síðustu misseri hefur Sena legið á gullinu. Á sama tíma hefur fyrirtækið hægt og rólega þróast frá því að vera tónlistarútgefandi á meðan kvikmyndadreifing og atburðarpartur þess hefur vaxið og vaxið. Megin áhersla Senu síðastliðin ár hefur aðallega legið í safnplötuútgáfu eða endurútgáfu klassískra listamanna á borð við Björgvins Halldórssonar, Bubba Morthens, Vilhjálms Vilhjálmssonar, Ellý Vilhjálmssonar, Hljóma, Trúbrot, Stuðmanna og fleira. Fyrirtækið hefur ekki tekið neina áhættu og þar af leiðandi staðnað. Síðustu ár er eflaust hægt að telja það á fingrum annarrar handar hversu margir nýir listamenn hafa fengið útgáfu hjá fyrirtækinu.

Jón Diðrik Jónsson forstjóri Senu og einn af verðandi hluthöfum í nýju fyrirtæki Sölva og Ólafs sagði að vegna þess hvernig mál þróuðust innan Senu hafi þeim liðið eins og risaeðlum í tölvuleikjasal. Áhuginn á að vera með framúrstefnulega tónlistarútgáfu hafi verið til staðar en að velgengni á öðrum sviðum innan fyrirtækisins hafi hreinlega tekið yfir. Hann vildi ekki missa af vagninum og fékk að teika með.

Aukið fjármagn, ný tækifæri

Með nýju fjármagni og nýrri stjórn sem lifir og hrærist í tónlist skapast ný tækifæri. Sölvi og Ólafur tilkynntu á fundinum að þeir hyggðust ætla að gefa út um 10 nýjar útgáfur á næsta ári. Sölvi og Ólafur eiga báðir í hljóðverum hér og þar um bæinn og geta vegna reynslu sinna og sambanda skapað tónlistarfólki tækifæri sem það sjálft þyrfti kannski að vinna lengur fyrir.

Einnig segja Sölvi og Ólafur að þeir vilji bjóða nýju tónlistarfólki samstarfssamninga sem eru í takt við nýtt útgáfu landslag. Listamönnum yrði ekki bara boðið að hljóðrita efni sitt, heldur einnig fagleg ráðgjöf hvað upptökur og vinnslu varðar, hvað kynningu efnis síns varðar og fengju allsherjar leiðbeiningu frá a til ö. Þar er kannski afturhvarf að ræða til þeirra tíma þegar rokkið var fyrst að ryðja sér til rúms í kringum sjötta og sjöunda áratug síðustu aldar.

Klassískir geisladiskar fá loks útgáfu á vínýl

Einnig kom fram á fundinum að nýjar áherslur  yrðu lagðar í það að viðhalda klassískum verkum úr gamla katalógnum. Sena var þegar byrjuð að því að endurútgefa valdar plötur á vínyl og vænta má aukningu í því. Til dæmis hefur 15 ára hluti katalógsins aldrei séð útgáfu á vínylplötum. Það voru þær plötur sem komu út á tímabilinu 1992 – 2007.

Á því tímabili má finna margar klassískar plötur sem gefnar voru út af fyrirtækjum sem Sena eignaðist seinna meir og hafa hingað til aðeins séð útgáfu í stafrænum gæðum. Þar má í fljótu bragði nefna plötur listamanna og sveita á borð við Jet Black Joe, Sálina hans Jóns míns, XXX Rotweilerhunda, Bubba Morthens, Maus og Ensími sem allar enduðu á lista bókarinnar yfir bestu plötur síðustu aldar. Búast má við því að einhverjar þeirra muni sjá endurútgáfur við valin tilefni á komandi árum.