Markalaust hjá AC Milan og Chievo

AC Milan og Chievo gerðu markalaust jafntefli í ítölsku seríu A-deildinni í knattspyrnu í hádeginu og fer leikurinn ekki í sögubækurnar fyrir gæði og skemmtun.

Liðin voru bæði í stökustu vandræðum með að skapa sér færi en um korteri fyrir leikslok skaut Andrea Bertolacci, leikmaður AC Milan, boltanum í þverslána.

Síðan á 90. mínútu náðu leikmenn Chievo að koma boltanum í netið en markið réttilega dæmt af vegna rangstöðu. Niðurstaðan því 0-0 jafntefli. AC Milan er í sjötta sæti deildarinnar með 48 stig en Chievo Verona í því 10. með 35 stig.