Endurvinnsla úr ónýttu fánaefni

„Mér finnst endurvinnsla bara mjög skemmtileg og sniðug,“ segir Sandra Borg Bjarnadóttir, sálfræðinemi og fatahönnuður. Hún saumar fjölnota poka sem hún vinnur úr fánaefni.

„Þetta eru fánar sem hafa prentast vitlaust, efnið sjálft er í góðu lagi,“ segir Sandra og bætir við: „Í staðinn fyrir að þessu efni sé hent þá sker ég það niður og geri litla poka. Efnið er rosalega sterkt, fánaefnið er búið til til þess að þola veður og vind.“

Hugmyndin kviknaði þegar hún heimsótti Fánasmiðjuna á Ísafirði. „Ég rak augun í allt efnið sem átti að henda og fannst alveg hræðilegt að henda því bara.“ Sandra ákvað því að taka málin í sínar hendur og búa til eitthvað nothæft úr efninu.

Hún er fatahönnuður en vinnur þó ekki sem slíkur. „Ég lærði fatahönnun en ég nenni ekkert að vinna sem fatahönnuður. Mér finnst skemmtilegra að kenna fólki að nota listina,“ segir hún og bætir við: „Það er í rauninni þess vegna sem ég er í sálfræðinni, mig langar til þess að læra listmeðferð.“

Sandra gerir auk pokanna tónlistarhálsmen úr plexígleri. Hægt verður að sjá hönnun og handverk Söndru í menningarhúsinu Molanum í Kópavogi á sýningunni Slagbrandi sem verður opnuð klukkan átta í kvöld.