Vilt þú verða liðsstjóri í sjónvarpþættinum Spilakvöld?

„Okkur vantar liðstjóra og það eina sem þeir þurfa að hafa er brennandi áhugi á spilum og leikjum. Liðsstjórar hafa möguleika á að koma fram í sjónvarpsþættinum Spilakvöld og vinna sér inn peningaverðlaun,“ segir Pétur Jóhann stjórnandi þáttarins.

Spilakvöld er nýr og stórskemmtilegur þrautaþáttur fyrir alla fjölskylduna sem hefur göngu sína í október. Þar etja frægir einstaklingar kappi í fjölbreyttum leikjum ásamt liðsstjórum sem leitað er nú að.

Allir eiga möguleika á að taka þátt með því að gerast liðstjórar sem geta leitt stjörnuhlaðið lið sitt til sigurs og unnið peningaverðlaun. Sendu nafn, mynd og upplýsingar á netfangið spilakvold@stod2.is fyrir miðnætti föstudaginn 18. september og segðu okkur af hverju þú værir fullkominn þátttakandi í þáttinn.

Þátturinn hefur slegið í gegn í öllum þeim löndum þar sem hann hefur verið framleiddur og má helst nefna upprunalegu útgáfuna Hollywood game night þar sem Jane Lynch stjórnar og hlaut Emmy verðlaun fyrir árið 2014 og er aftur í ár fyrir þáttastjórn í Hollywood Game night.

„Verkefnið gengur ótrúlega vel og við erum mjög spennt,“ segir Pétur að lokum, en tökur hefjast í næstu viku.

Spilakvöld hefst á Stöð 2 í október.