Eplabaka Evu Laufeyjar

Þessi eplabaka er ómótstæðileg, hún er bæði ótrúlega einföld og fljótleg. Ég mæli með að þið berið hana fram með karamellusósu og ís. Ég þori að lofa ykkur því að þið eigið eftir að gera þessa böku aftur og aftur.

Eplabaka 

5-6 stór græn epli

2 msk. sykur

2 - 3 tsk. kanill

1 tsk. vanillusykur eða vanilludropar

50 - 60 g. Hakkað súkkulaði

80 g. hveiti

80 g. sykur

80 g. smjör

50 g. Haframjöl

Aðferð: Hitið ofninn í 180°C. Flysjið eplin, fjarlægið kjarna og stilka. Skerið eplin í litla bita og dreifið eplabitunum í eldfast mót. Blandið sykri, vanillusykri og kanil saman við eplin. Sáldrið súkkulaðinu yfir eplin. Næsta skref er að útbúa deigið sem fer ofan á eplin. Blandið hveiti, sykri, smjöri og haframjöli saman í skál og blandið saman með höndunum. Setjið deigið ofan á eplin og bakið við 180°C í 40 - 45 mínútur. 

Á meðan að bakan er í ofninum þá er upplagt að útbúa ljúffenga karamellusósu. 

Karamellusósa

Þetta er sósan sem þið verðið að prófa. Hún passar vel með kökum og eftirréttum. Í raun gæti ég borðað hana eina og sér. Sósan geymist í ísskáp í tvær vikur. Það er ágætt að hita hana aðeins upp áður en þið berið hana fram. Ég þori að lofa ykkur því að þið kaupið ekki aftur tilbúna sósu þegar þið hafið útbúið ykkar eigin.

200 g sykur

2 msk smjör

½  - 1 dl rjómi

½ tsk salt (sjávarsalt er best að mínu mati)

Aðferð: Setjið sykurinn á pönnu og bræðið hann við vægan hita. Gott er að hafa ekki of háan hita og fara hægt af stað. Takið pönnuna af hellunni þegar sykurinn er allur bráðinn og bætið smjörinu saman við og hrærið vel. Hellið rjómanum út í karamelluna og hrærið þar til karamellan er þykk og fín. Í lokin bætið þið saltinu saman við. Það er líka afskaplega gott að rista hnetur og bæta út í sósuna.