Fékk 92 cm lax í Varmá á Þýska snældu

Veiðitímabilið er ekki búið ennþá en það er rétt vika eftir af veiðitímanum í þeim ám sem eru ennþá opnar og ein af þeim er Varmá en þar eru ennþá að veiðast stórfiskar.

Ómar Smári Óttarsson gerði góða ferð í ánna í fyrradag en þar náði hann að setja í og landa laxi sem mældist 92 cm að lengd og er líklega um 16-18 pund.  "Ég kastaði ì Reykjarfoss og bjòst ég nù ekki við að fà fisk þar en bara ì fyrsta kasti var tekið og auðvitað þýska snældu eins og alltaf ì Varmà" sagði Ómar og bætti við "Ég vissi strax að þetta var stòr fiskur því  hann var bara à botninum og það var bara verið að toga.  Ég var með Cortland stöng fyrir lìnu 5 og hùn var alveg boginn ì drasl. Þetta var bara tog og labbaði ég bara fram og til baka um hylinn. Và hugsaði ég og djöfull var hann sterkur þegar ég sà hann koma upp missti ég andlitið ég hef aldrei sett ì svona stòrann fisk sìðan endaði ég með að nà honum à land 92cm kvikindi" sagði Ómar og var kampakátur með afrekið.

Þetta er samkvæmt okkar bestu heimildum einn stærsti fiskurinn úr ánni í sumar.  Ennþá eru stangir lausar í Varmá fyrir þá sem vilja klára sumarið á fallegum haustdögum en lausa daga má finna á vef SVFR á www.svfr.is