Töfradúfan hræddi bíógesti

Einar Mikael töframaður hefur þjálfað fjórar dúfur sem taka þátt í hinum ýmsu töfrabrögðum með honum. Þær leika þannig stórt hlutverk bæði í sjónvarpsþáttunum Töfrahetjurnar sem sýndir eru á Stöð 2 á föstudögum klukkan 18 en verða einnig áberandi á Sýningu aldarinnar sem fram fer í Háskólabíói 23. og 26. október.

Dúfurnar hafa fylgt Einari Mikael lengi og kunna sitt fag. Hins vegar er með þær líkt og öll dýr að þær geta verið óútreiknanlegar. „Þegar við vorum að taka upp þættina í sumar flaug ein dúfan upp í rjáfur á Bíóhöllinni á Akranesi þar sem tökur fóru fram á daginn. Við ákváðum að leyfa henni að sitja þar þangað til henni þóknaðist sjálfri að koma niður. Um kvöldið var bíósýning í húsinu og á dagskrá var hryllingsmynd. Á ögurstundu í myndinni flaug dúfan niður og lenti á sviðinu og allur salurinn fékk áfall,“ segir Einar Mikael hlæjandi. Dúfunni varð ekki meint af og var í góðu yfirlæti hjá strákunum í Bíóhöllinni, fékk popp og beið þess að hefja tökur næsta dag.

Sýning Aldarinnar frábær fjölskyldusýning sem samanstendur af ótrúlegum töfrabrögðum og mögnuðum sjónhverfingum. 

Sjónhverfingarnar í sýningunni eru á heimsmælikvarða, þar á meðal þekktasta sjónhverfing fyrr og síðar þar sem kona er söguð í sundur og meira segja fær einn heppinn áhorfandi úr sal að fljúga í lausu lofti. Sýningin inniheldur atriði sem hingað til hefur bara verið hægt að sjá í Las Vegas.

Í sýningunni fá áhorfendur að sjá frábærar listir með hæfileikaríkum dýrum. Meðal dýra verður Amazon fuglar, hrafn og hundur.

Eftir sýninguna gefst fólki kostur á að kaupa ýmsa töfrahluti fyrir upprennandi töframenn. Einnig gefst gestum tækifæri á að fá mynd af sér með Einari töframanni og Viktoríu töfrakonu.

Hér fyrir neðan má sjá stutt myndband úr Sýningu aldarinnar en miða má kaupa á midi.is