4 laxar á land opnunardaginn í Ytri Rangá

Ytri Rangá opnaði fyrir veiði í gær en áin var aflahæst allra laxveiðiánna í fyrra og það verður að teljast líklegt að hún berjist um þann titil í sumar.

Það komu 4 laxar á land, allnokkrir sjóbirtingar og aðrir 4 laxar sluppu en það eru Norðmenn við veiðar og samkvæmt Jóhannesi Hinrikssyni veiðiverði eru þeir helst til rólegir við veiðarnar.  "Þeir fara helst ekki út fyrr en 10 á morgnana og eru alveg ofsalega afslappaðir við veiðarnar" sagði Jóhannes í samtali í dag.  Laxarnir sem komu á land og sluppu voru allir fyrir utan einn vænir tveggja ára laxar en það er þessi eini eins árs lax sem vakti mesta athygli veiðimanna í gær.  Fyrir það fyrsta sjást varla eins árs laxar fyrr en í byrjun júlí í ánni en þessi kom upp á Tjarnarbreiðu og var löngu búinn að fella af sér lús og gönguhreistur.  Þetta var stuttur, þéttur og pattaralegur 4 punda lax.  Fyrsta bylgjan í ánna kemur yfirleitt um síðasta júnístraum en dagarnir á undan og eftir hafa líka verið gjöfulir.  Það verður spennandi að fylgjast með ánni í sumar og keppni sem nokkuð víst að á eftir að verða spennandi um toppsætið en þar keppa systurárnar Ytri og Eystri venjulega um forystuna.