ÍBV kastaði frá sér sigrinum Ásvöllum | Ekkert mark síðustu 7 mínúturnar

Haukar fögnuðu sigri á ÍBV, 29-28, í mögnuðum fyrsta leik liðanna í lokaúrslitum Olís-deildar karla í handbolta í gærkvöldi og eru 1-0 yfir í einvíginu en leikur tvö fer fram í Vestmannaeyjum.

„Það var í raun og veru okkar klúður sem urðu til þess að við fengum ekki meira út úr þessum leik. Það er dýrt að klikka á þessum dauðafærum í lokin,“ sagði Arnar Pétursson, annar þjálfara ÍBV, við Vísi eftir leikinn í gærkvöldi.

Arnar lýgur engu því Eyjamenn geta engum nema sjálfum sér um kennt að hafa ekki tekið forystu í einvíginu á heimavelli deildar- og bikarmeistaranna.

ÍBV komst tveimur mörkum yfir, 26-28, þegar sex mínútur og 50 sekúndur voru eftir af leiknum en köstuðu leiknum svo frá sér. Bókstaflega. Eyjamenn skoruðu ekki mark það sem eftir lifði leiks en fengu á sig þrjú og töpuðu leiknum.

Heppnin var í liði með Haukum því Árni Steinn Steinþórsson minnkaði muninn í 27-28 þegar enn voru rétt rúmar sex mínútur eftir af leiknum. Skot hans var varið af Kolbeini Ingibjargarsyni í markinu en hann fékk boltann aftur í sig og svo lak hann yfir línuna.

Magnús Stefánsson gaf boltann í hendur Hauka í næstu sókn Eyjamanna, Kolbeinn varði svo í tvígang frá Haukunum eftir það en hinum megin varði Giedrius Morkunas sirkustilraun Eyjamanna. Tvær sóknir farnar forgörðum hjá gestunum.

Áfram héldu Eyjamenn að gera sér óleik en Guðni Ingvarsson fékk fyrstu brottvísun gestanna eftir 56 mínútur og tíu sekúndur. Haukarnir nýttu sér liðsmuninn og Jón Þorbjörn Jóhannsson jafnaði metin, 28-28, með marki af línunni eftir fallega sendingu Árna Steins.

Þarna voru tæpar fjórar mínútur eftir og ákvað Patrekur Jóhannesson, þjálfari Hauka, þá að taka Róbert Aron Hostert, leikstjórnanda ÍBV, úr umferð. Hann sá ekki eftir þeirri ákvörðun.

Sóknarleikur ÍBV var ekki góður með Róbert úr spilinu í næstu tveimur sóknum og reyndi fyrst Agnar Smári Jónsson slakt skot úr erfiðu færi og svo Magnús Stefánsson. Bæði skotin greip Morkunas í markinu og fjórar sóknir farnar í súginn hjá ÍBV. Staðan áfram, 28-28.

Þegar ein mínúta og 13 sekúndur voru eftir af leiknum skoraði Sigurbergur Sveinsson sigurmarkið með skoti af níu metrum sem söng í netinu. Staðan 29-28 en áfram nægur tími fyrir ÍBV að jafna.

Þjálfarar ÍBV tóku leikhlé og lögðu upp leikkerfi sem heppnaðist fullkomlega. Loksins tókst Eyjamönnum að brjóta frábæra vörn Hauka á bak aftur en Andri Heimir Friðriksson gerði sig sekan um slæm mistök þegar hann skaut langt framhjá úr dauðafæri, einn á móti Morkunas.

Þá voru aðeins 36 sekúndur eftir. Eyjamenn hálfpartinn hleyptu Elíasi Má Halldórssyni í gegn til að reyna að fá boltann aftur og það heppnaðist. Kolbeinn varði úr dauðafæri en honum gekk illa að koma boltanum í leik og hafnaði sending hans fram völlinn í höndum varamanna Hauka fyrir utan hliðarlínuna. Leik lokið.

Haukar skelltu sem sagt í lás síðustu sjö mínúturnar og fengu ekki á sig mark en skoruðu þrjú mörk úr sex sóknum. Að auki fékk liðið þrjú dauðafæri til viðbótar sem Kolbeinn varði þannig sigurinn hefði ekki þurft að vera svona tæpur þegar uppi var staðið.

Hinum megin skoraði ÍBV ekki mark í fimm sóknum á síðustu sjö mínútunum. Sendingarfeill, varin sirkusmarkstilraun, tvö slök skot fyrir utan og eitt dauðafæri sem fór forgörðum gerði út um sigurvonir liðsins. Það eru þessi litlu atriði sem Eyjamenn þurfa að fínpússa fyrir næsta leik.

Upptöku af leiknum má sjá á vef RÚV en atburðarásin sem hér er farið yfir hefst á 95:00.

Sóknarnýting ÍBV síðustu sjö mínúturnar:

Sóknir: 5 (0 mörk)

Óáreitt skot fyrir utan: Engin

Skot úr erfiðri stöðu: 2 (0)

Dauðafæri: 2 (0)

Tæknifeilar: 1 (Misheppnuð sending)

Sóknarnýting Hauka síðustu sjö mínúturnar:

Sóknir: 6 (3 mörk)

Óáreitt skot fyrir utan: 2 (2)

Skot úr erfiðri stöðu: 1 (0)

Dauðafæri: 3 (1)

Tæknifeilar: Engir