Milljarðaklúður þegar bankamaður dottaði yfir lyklaborðinu

Dómstóll í Hessen í Þýskalandi hefur komist að þeirri niðurstöðu að yfirmanni í banka þar í landi hafi verið ólöglega vikið úr starfi fyrir að koma ekki í veg fyrir milljarðaklúður þegar einn af undirmönnum hans dottaði yfir lyklaborði sínu.

Forsaga málsins er sú að undirmaðurinn var að millifæra 64,20 evrur milli reikninga þegar hann dottaði með fingurinn á tölunni 2 á lyklaborðinu. Því yfirfærði hann 222,222,222,22 evrur, það er rúmlega 222 milljónir evra eða um 35,5 milljarða kr. , milli reikninganna. Þessi mistök komu fljótlega í ljós og voru lagfærð.

Í framhaldinu var yfirmaður þessa starfsmanns rekinn úr starfi yfir að hafa ekki komið auga á þetta klúður og staðfest millifærsluna. Yfirmaðurinn viðurkenndi mistök sín en það var starfsfélagi hans sem leiðrétti klúðrið. Í framhaldinu var yfirmaðurinn rekinn úr starfi.

Yfirmaðurinn sætti sig ekki við brottreksturinn og fór í mál við bankann. Dómarinn í málinu komst að fyrrgreindi niðurstöðu með þeim rökum að enginn ásetningur hafi verið að baki mistökum yfirmannsins. Hann hafi því fyrst átt að fá áminningu áður en honum var vikið úr starfi. Í framhaldinu skipaði dómarinn bankanum að endurráða yfirmanninn.