Kynþokkafyllsti maður heims fjölgar sér á næsta ári

„Það er opinbert! Tvær ótrúlega fallegar sálir eru í þann mund að færa aðra fallega sál inn í þennan heim," var skrifað á Facebook-síðu kyntröllsins Channings Tatum á mánudagskvöldið og mynd af honum og eignkonu hans Jennu Dewan-Tatum látin fylgja með.

Channing og Jenna, sem bæði eru 32 ára, kynntust þegar þau léku saman í dansmyndinni Step Up árið 2006. Það var fyrsta myndin í Step Up-ævintýrinu en síðan hafa verið gerðar þrjár myndir til viðbótar. Þau giftu sig árið 2009 og eiga nú von á sínu fyrsta barni.

Jenna mætti í veislu á vegum VH-1 á sunnudaginn og stillti sér þá upp í myndatöku þar sem vel mátti sjá móta fyrir óléttukúlunni. Þar sagði hún í viðtali við Access Hollywood að þau hjón vildu klárlega eignast fjölskyldu og að það myndi gerast þegar það ætti að gerast. Nokkrum klukkutímum síðar var óléttan staðfest og Channing þakkaði allar hamingjuóskirnar á Twitter-síðu sinni í gær.

Það má vel ætla að barnið komi til með að hafa útlitið með sér, en báðir eru foreldrarnir taldir einstaklega myndarlegir. Jafnframt leikferlinum hefur Jenna unnið fyrir sér sem fyrirsæta í mörg ár og þær eru margar stúlkurnar sem dreymir um Channing Tatum, dags og nætur. Því til sönnunar var hann valinn kynþokkafyllsti maður í heimi af tímaritinu People nú í nóvember og tók þar með titilinn af hjartaknúsaranum Bradley Cooper.