Metnaðarfyllsta verkefnið

„Þessi fjármögnunarleið er alveg glæný hér á landi og mjög spennandi. Ég tel þetta vera eitt af síðustu skrefunum í þessari þróun sem hefur verið undanfarin ár að gera myndir meira demókratískar," segir leikstjórinn og handritshöfundurinn Óskar Bragi Stefánsson.

Óskar Bragi er nú að safna fyrir eftirvinnslu nýrrar stuttmyndar sinnar, Infinite, og notar til þess fjármögnunarsíðuna Karolina Fund, þar sem hver sem er getur stutt verkefnið með peningagjöf. Karolina fund er fyrsta síðan sinnar gerðar á Íslandi en þetta fyrirkomulag er þekkt úti í heimi.

Infinite er mynd sem fjallar um tvær reikistjörnur sem brenna út við endimörk alheimsins. Hún hefur þegar verið skotin og klippt og það án nokkurra fjárframlaga. Eftirvinnslan er þó flóknari og þarf því fjármagn í hana. Það eru Hilmir Jensson og Thelma Marín Jónsdóttir sem fara með aðalhlutverkin í Infinite en Högni Marsellíus Þórðarson sá um kvikmyndatöku.

„Það var hrikalega gaman að vinna með svona miklu af hæfileikaríku fólki. Það voru margir sem komu að henni og mikið af fólki sem á svakalega stóran hluta í þessari mynd," segir Óskar Bragi. „Það má eiginlega segja að þetta sé fyrsta alvöru stuttmyndin mín. Þetta er í það minnsta stærsta og metnaðarfyllsta verkefni sem ég hef tekið mér fyrir hendur hingað til," bætir hann við.