Tónlist, uppvask og tíska í New York

„Við spiluðum á alls konar klúbbum og börum í borginni og vorum alveg rosalega bókaðir, yfirleitt vorum við með upp í þrjú gigg í viku og þegar aðsóknin var góð vorum við að fá 200 dollara fyrir kvöldið," segir hinn 18 ára gamli Gunnar Ágúst Thoroddsen, gítarleikari hljómsveitarinnar Icarus.

Þeir Gunnar, Atli Steinn og Elias Andri skipa hljómsveitina og eyddu þeir sumrinu í New York þar sem þeir spiluðu á klúbbum og börum, tóku upp sína fyrstu EP-plötu og unnu. „Mamma vildi endilega fá mig út í sumar en af því að ég vildi geta spilað með hljómsveitinni bauð hún okkur bara öllum," segir Gunnar og hlær. Móðir Gunnars á tískufyrirtækið Moda Operandi þar í borg og fengu Atli Steinn og Elias Andri vinnu hjá henni en Gunnar aftur á móti vann í uppvaski og glasatínslu á bar.

Icarus tók þátt í Músíktilraunum 2012 og var það þeirra fyrsta skipti á sviði. „Eftir árangurslausa leit að bassaleikara ákváðum við Atli að kenna bara Eliasi, besta vini okkar, á bassa. Hann stóð sig ótrúlega vel og við tókum þátt í Músíktilraunum tveimur vikum seinna," segir Gunnar en Icarus komst þar áfram á úrslitakvöldið.

Aðspurður segir Gunnar erfitt að lýsa tónlistinni sem þeir spila, en hún sé eins konar „kraftbundið" þungarokk. Eins og er er hljómsveitin einungis skipuð hljóðfæraleikurum og Gunnar segir það vera í skoðun hvort þeir fái sér söngvara. „Kannski ef við finnum einhvern rosalega góðan, við viljum bara það besta eða ekkert," segir hann.- trs