Hélt 250 rottur á heimili sínu

Talið er að allt að 250 rottur hafi haldið til á heimili fullorðinnar konu á Helsingjaeyri í Danmörku áður en heilbrigðisyfirvöld tóku til sinna ráða fyrir skemmstu. Konan hafði að sögn danskra miðla haldið rotturnar líkt og um gæludýr væri að ræða.

Ábending barst um músagang við húsið, en konan var þá á sjúkrahúsi.

Þegar inn var komið blasti við urmull af rottum sem höfðu komið sér fyrir um allt hús. Innanstokksmunir og gólfefni voru ónýt og úrgangur og hreiður um allt.

Rúmlega 200 rottur voru drepnar eða fangaðar, en hafa eflaust verið nokkuð fleiri. - þj