Sungið á bak við lás og slá

Tveggja ára fangelsisdómur yfir rússnesku pönksveitinni Pussy Riot fyrir óeirðir í kapellu í Moskvu hefur vakið gríðarlega athygli. Ekki er algengt að heilu hljómsveitirnar séu dæmdar í fangelsi en fjölmargir frægir tónlistarmenn hafa í gegnum tíðina þurft að sitja á bak við lás og slá fyrir hin ýmsu afbrot.

Ók inn í ljósmyndavöruverslun

George Michael hefur ítrekað komið sér í vandræði, oftast fyrir eiturlyfjanotkun sína. Fyrir tveimur árum var hann dæmdur í átta vikna fangelsi og missti ökuleyfið í fimm ár eftir að hafa ekið enn og aftur undir áhrifum eiturlyfja. Hann náðist eftir að hafa ekið Range Rover-bíl sínum inn í ljósmyndavöruverslun. Hann sat inni í fjórar vikur í Highpoint-fangelsinu í Suffolk á Englandi.

Á toppnum í fangelsinu

Rapparinn Lil Wayne var dæmdur í eins árs fangelsi á Rikers Island í New York fyrir að hafa byssu í fórum sínum. Á þeim tíma tókst honum að stofna bloggsíðu, hefja sölu á stuttermabolum í gegnum síðuna og vinna að plötu með kollega sínum Drake. Annar rappari, hinn sálugi Tupac Shakur, varð fyrsti tónlistarmaðurinn til að ná plötu á topp bandaríska listans sitjandi í fangelsi. Hún nefnist Me Against The World. Hann nýtti einnig tímann til að kvænast og semja handrit að kvikmyndinni Live 2 Tell.

Braust inn til vinar síns

Pete Doherty er vandræðagemlingur sem hefur margoft komist í kast við lögin. Árið 2003 var hann dæmdur í tveggja mánaða fangelsi fyrir að hafa brotist inn í íbúð Carls Barât sem var með honum í hljómsveitinni The Libertines og stolið ýmsum verðmætum. Doherty sat inni í einn mánuð í fangelsinu Pentonville á Englandi. Þar samdi hann lagið Pentonville þar sem hann kvartaði yfir því að hafa þurft að sofa á óþægilegri dýnu.

Þrjú ár í Víetnam

Gamla glyshetjan Gary Glitter kom sér í vandræði þegar barnaklám fannst í tölvu hans þegar hann fór með hana í viðgerð árið 1997. Glitter flúði heimaland sitt England til Spánar og síðar Víetnams, þar sem hann var ákærður fyrir kynferðisbrot gegn tveimur stúlkum undir lögaldri. Eftir þriggja ára fangelsisvist í Binh Thuan í Víetnam var hann framseldur til Bretlands þar sem hann fer nú huldu höfði.

Hundeltur af lögreglunni

Sálargoðsögnin James Brown var átta sinnum handtekinn fyrir hin ýmsu brot. Það alvarlegasta átti sér stað 1988. Þá veifaði hann hlaðinni byssu í skrifstofuhúsnæði sínu og krafðist þess að fólkið þar hætti að nota salernin hans. Eftir að hafa verið eltur í bíl af lögreglunni í gegnum tvö ríki Bandaríkjanna var hann loksins handsamaður. Síðar kom í ljós að hann hafði notað eiturlyfið PCP sem veldur ofskynjunum.

Tíu dagar í Tókýó

Bítillinn fyrrverandi Paul McCartney þurfti að dúsa í tíu daga í fangelsi í Tókýó í Japan 1980 eftir að hafa verið handtekinn á flugvellinum í Tókýó með marijúana í farangri sínum. Hann átti yfir höfði sér allt að sjö ára fangelsi en slapp vel. Honum var vísað úr landi og var bannað að snúa aftur til Japans. Hann sneri samt aftur til eyjarinnar og hélt þar tónleika en ekki fyrr en tíu árum síðar.

Ein nótt í fangelsi

Rollingarnir Mick Jagger og Keith Richards þurftu að dúsa í eina nótt í Brixton-fangelsinu á Englandi árið 1967 vegna eiturlyfjamisferlis. Daginn eftir var þeim sleppt lausum gegn tryggingu. Jagger var síðar dæmdur í þriggja mánaða fangelsi fyrir að hafa dóp í fórum sínum og Richards var dæmdur í eins árs fangelsi fyrir að leyfa kannabisreykingar á heimili sínu. Dómarnir þóttu alltof strangir og voru þeir felldir niður eftir að málinu var áfrýjað.