Sýnir einstök augnablik úr tískumyndatökum

„Ég byrjaði ekki að taka myndir fyrr en ég var tvítug og vissi þá ekki hvað ljósop var. Pabbi keypti myndavél og ég byrjaði að fikta," segir Aníta Eldjárn Kristjánsdóttir sem opnar sína fyrstu stóru ljósmyndasýningu í Artíma Galleríi í dag.

Sýningin ber yfirskriftina Á milli mynda og prýða veggi gallerísins myndir sem fanga einstök augnablik úr nýlegum tískumyndatökum hennar.

Aníta lauk námi í ljósmyndun við skólann Norsk Fotofagskole í Noregi fyrir ári og hefur vakið athygli sem tísku- og mannlífsljósmyndari síðan. „Ég hef tekið myndir meðal annars fyrir Nude Magazine, Þórunni Antoníu, plötuumslag hljómsveitarinnar Kiriyama Family og hönnuði. Einnig hef ég tekið lista- og tískutengdar myndir fyrir DV, var ljósmyndari fyrir Iceland Airwaves-hátíðina í ár og Nýtt líf á Reykjavík Fashion Festival," segir hún þakklát fyrir þann áhuga sem fólk hefur sýnt störfum hennar.

„Þetta hefur gengið vonum framar," segir hún og bætir við að hún hafi ákveðið að taka upp sið kennara síns og auglýsa sig ekki. „Ég hef ekki sóst eftir verkefnum heldur hefur boltinn rúllað og fólk haft samband við mig."

Sýningin opnar klukkan átta í kvöld og stendur til 17. júlí.

- hþt