Skráning Facebook dregur dilk á eftir sér

Gengi Facebook féll um 9 prósent í gær, en daginn þar á undan féll gengi bréfa félagsins um tæplega 11 prósent. Þetta hrun á markaðsvirði félagsins hefur nú kallað fram sterk viðbrögð hjá fjárfestum sem hafa tapað á fjárfestingunni í Facebook, og er þar ekki síst horft til þess hvernig skráningin var kynnt fyrir þeim sem keyptu bréf strax við skráningu. Þar beinast spjótin að bankanum sem hafði umsjón með skráningarferlinu fyrir hönd Facebook, Morgan Stanley.

Richard Ketchum, framkvæmdastjóri Fjármálaeftirlitsins í New York (FINRA), segir í viðtali við Wall Street Journal að nú sé verið að skoða tiltekin atriði er varðar skráningu félagsins, er þar ekki síst horft til kynningargagna um útboðið.

Gengi Facebook var í 31 dal á hlut í gær en við skráningu, sl. föstudag, var það 38.

Minni fjárfestar hafa einnig kvartað til dómstóla í New York vegna tæknilegra erfiðleika hjá Nasdaq á fyrsta degi viðskipta með Facebook bréfin, en skráningunni var seinkað um hálftíma vegna þeirra. Þessir erfiðleikar eru sagðir hafa leitt til taps fyrir marga fjárfesta, að því er fram kemur í umfjöllun breska ríkisútvarpsins BBC um málið.

Sjá má umfjöllun BBC hér.