Pepsi-deild kvenna: Stjarnan lagði KR

Íslandsmeistarar Stjörnunnar unnu góðan sigur, 3-1, á sigurlausu liði KR í Pepsi-deild kvenna í kvöld. Leikurinn var sýndur í beinni útsendingu á Vísi.

Edda María Birgisdóttir kom Stjörnunni yfir um miðjan fyrri hálfleik og það var eina mark fyrri hálfleiks.

Ashley Bares kom Stjörnunni í 2-0 í upphafi þess seinni en Alma Rut Garðarsdóttir minnkaði muninn fyrir KR þegar tæpur hálftími var eftir af leiknum.

Lengra komst KR ekki því fyrirliðinn Gunnhildur Yrsa Jónsdóttir gulltryggði sigurinn fyrir Stjörnuna.

Stjarnan komst í þriðja sæti deildarinnar með sigrinum en KR er í næstneðsta sæti.