Notendafjöldi Facebook kominn yfir 900 milljónir

Notendafjöldi Facebook er nú kominn yfir 900 milljónir manna á heimsvísu, samkvæmt tölum sem birtar voru um notkun og rekstur Facebook í morgun.

Fjöldi notenda hefur á einu ári aukist um 220 milljónir manna, úr 680 í 901 milljón. Þá hefur daglegum notendum Facebook fjölgað úr 372 milljónum í fyrra í 526 milljónir á þessu ári.

Á fyrsta ársfjórðungi þessa árs námu tekjur Facebook ríflega einum milljarði dollara, eða sem nemur tæplega 128 milljörðum króna. Á sama tímabili námu tekjurnar 731 milljón dollara, eða sem nemur 93 milljörðum króna.

Þá var uppgefið í dag hvernig Facebook greiðir fyrir myndasamfélagsmiðilinn Instagram, en Facebook greiðir 300 milljónir dollara með reiðufé og restina með hlutafé í Facebook, samtals 23 milljónir hluta, sem eru virði um 700 milljóna dollara.

Mánaðarlegum notendum Facebook í snjallsímum hefur fjölgað hratt, en þeir eru nú 488 milljónir.

Á hverjum degi eru „like" á vefnum sem nemur 3,2 milljörðum, yfir 300 milljónum mynda er hlaðið á Facebook veggi á hverjum degi og 125 milljónir vinasambanda verða til á hverjum degi.