Seðlabanki Bandaríkjanna mun hagnast á björgunarlánum

Bandaríski seðlabankinn tilkynnti um það í dag, að útlit væri fyrir að bankinn myndi hagnast á fjárveitingum sem fóru til banka á Wall Street haustið 2008, þegar fjármálakerfið riðaði til falls. Þá munu öll lán, og jafnvel um tveir milljarðar dollara að auki, sem fóru til bílaframleiðenda og tryggingarfélaga skila sér til baka.

Bankinn segir þó að þessar lánveitingar hafi aðeins verið smánarhluti í samanburði við  heildartapið í bandarísku hagkerfi vegna hruns á fjármálamörkuðum, sem hafi numið um 19.200 milljörðum dollara. Lánin til bankanna og bílaframleiðenda hafi hins vegar borgað sig, þar sem þau komu í veg fyrir að kreppan dýpkaði enn frekar, sagði Ben Bernanke, seðlabankastjóri þegar mat bankans var kynnt.

Talið er að lán til bílaframleiðenda hafi komið í veg fyrir að 230 þúsund störf töpuðust. Lánveitingar til General Motors og Chrysler námu 22 milljörðum dollara, en allt bendir til þess að þeir fjármunir skili sér til baka með vöxtum.

Bernanke sagði stöðu efnahagsmála í Bandaríkjunum enn vera viðkvæma, og að þó þessar lánveitingar muni ekki verða byrði á skattgreiðendum, þá sé það aðeins smáatriði við hlið þess að snúa efnahagslífinu aftur á réttan kjöl og lækka atvinnuleysi, en það er í dag ríflega níu prósent í Bandaríkjunum.