Dýrt spaug í Hollywood

Bandaríska gamanmyndin Jack & Jill með Adam Sandler í aðalhlutverki hefur fengið afleita dóma meðal gagnrýnenda, auk þess sem aðsóknin hefur verið langt undir væntingum. Fréttablaðið tók saman lista yfir fimm aðrar misheppnaðar gamanmyndir sem eiga það sameiginlegt að hafa fengið herfilega dóma og tapað svimandi háum fjárhæðum.

The Love Guru (2008)

Eftir vinsældir Austin Powers-mynda Mikes Myers var eftirvæntingin mikil þegar ástargúrúinn leit dagsins ljós. Með Myers í leikaraliðinu var Óskarsverðlaunahafinn Ben Kingsley og Jessica Alba en allt kom fyrir ekki og myndin olli miklum vonbrigðum. Kostnaðurinn nam 62 milljónum dollara, eða um 7,4 milljörðum króna, en samanlagðar tekjurnar voru um 40 milljónir, eða 4,8 milljarðar.

Love Guru var tilnefnd til sjö Golden Raspberry-skammarverðlauna, eða Razzies, og vann þrenn, þar á meðal sem versta myndin.

Einkunn á Imdb.com: 3,8

Son of the Mask (2005)

Kvikmyndin The Mask með Jim Carrey í aðalhlutverki hitti rækilega í mark og festi Carrey í sessi sem einn vinsælasta gamanleikara Hollywood. Ellefu árum síðar kom framhaldið en í þetta sinn var Carrey fjarri góðu gamni. Betur hefði mátt vanda til verka. Myndin kostaði væna summu, eða 84 milljónir dollara, en þénaði aðeins um 17 milljónir vestanhafs.

Son of the Mask var tilnefnd til átta Razzies-verðlauna og hlaut ein.

Einkunn á Imdb.com: 2,1

Superbabies – Baby Geniouses 2 (2004)

Næstlélegasta kvikmynd sögunnar samkvæmt Imdb.com á eftir hinni þýsku Daniel – Der Zauberer. Hið merkilega er að Jon Voight, sem á að baki fínar myndir á borð við Midnight Cowboy, Deliverance og Mission Impossible, skuli hafa lagt nafn sitt við hana. Söguþráðurinn er aukaatriði en myndin kostaði 20 milljónir dollara og náði inn aðeins 9 milljónum í miðasölunni.

Hún fékk fjórar tilnefningar til Razzies-verðlaunanna, þar á meðal Jon Voight fyrir versta leik í aukahlutverki.

Einkunn á Imdb.com: 1,5

The Adventures of Pluto Nash (2002)

Eddie Murphy fór með aðalhlutverkið í þessari rándýru en kolómögulegu fýlusprengju sem tapaði gríðarlegum upphæðum. Myndin kostaði heilar 100 milljónir dollara í framleiðslu, eða tæpa 20 milljarða króna, en samanlagðar tekjur hennar í miðasölunni voru aðeins um 7 milljónir dollara.

Hún fékk fimm tilnefningar til Razzies.

Einkunn á Imdb.com: 3,6

Ed (1996)

Matt LeBlanc úr Vinum lék hæfileikaríkan kastara í hafnaboltaliði sem vingaðist við simpansa sem einnig kunni sitthvað fyrir sér í boltanum. Framleiðslukostnaðurinn nam um 24 milljónum dollara en myndin þénaði aðeins rúmar 6 milljónir í miðasölunni vestanhafs. Mikil vonbrigði fyrir LeBlanc sem þá var einn vinsælasti sjónvarpsleikari Bandaríkjanna.

Niðurstaða: Þrjár tilnefningar til Razzies-verðlaunanna, þar á meðal fyrir versta bíóparið.

Einkunn á Imdb.com: 2,4

freyr@frettabladid.is