Vötn og Veiði komin út

Stangaveiðiárbókin Vötn og Veiði er nýlega komin í verslanir, en árbók um stangaveiði hefur þar með komið út í einni mynd eða annarri allt frá árinu 1988.

Bókin, Vötn og Veiði – Stangaveiði á Íslandi 2011 er með sama sniði og síðustu ár, og þar með efni hennar. Hlaupið er á helstu fréttum ársins á stangaveiðisviðinu, birtar veiðisögur, veiðitölur og allt saman ríkulega myndskreytt. Eins og síðustu árin eru nokkur veiðisvæði tekin fyrir og umsjónarmenn ritsins segja frá persónulegri reynslu sinni af þeim á nýliðinni vertíð. Svæðin sem skoðuð voru að þessu sinni voru Setbergsá á Skógarströnd, Straumfjarðará, Eldvatn í Meðallandi sem var heimsótt bæði að vori og hausti, silungasvæði Breiðdalsár, sem hefur verið lengt og inniheldur nú umtalsverða laxavon, og Kráká sem er athyglisverð silungsveiðiá, svo ekki sé meira sagt.

Útgefandi er sem fyrr Litróf/Hagprent og ritstjóri Guðmundur Guðjónsson.