Dularfull DSB lest var gjöf til Gaddafi

Silvio Berlusconi forsætisráðherra Ítalíu hefur sennilega sent danska IC4 járnbrautarlest sem gjöf til Gaddafi leiðtoga Líbýu. Það er ítalska félagið Ansaldobreda sem sérsmíðar þessar lestar fyrir danska lestarfélagið DSB.

Í umfjöllun Jyllands Posten um málið segir að í þessari viku hafa alveg óvænt birst mynd í þekktu alþjóðlegu tímariti um járnbrautir af IC4 lest á járnbrautarteinum í Líbýu. Í fyrstu var talið að Ansaldobreda hefði sent lestina þangað til prufukeyrslu.

DSB hefur tjáð sig um málið en þar á bæ segja menn að þessar lestir séu í eigu Ansaldobreda þar til þær yfirgefi Ítalíu. Að öðru leyti vill stjórn DSB ekki tjá sig um málið.

IC4 lestin í Líbýu er mjög frábrugðin þeim sem Danir fá hvað innréttinguna varðar. Þar er að finna stóra hvíta leðursófa, gólfteppi, gardínur og standlampa. Utan á lestinni er áritun á arabísku sem skilja má sem hyllingu til Gaddafi. Og í ljós er komið að lestin sást fyrst í landinu eftir opinbera heimsókn Berlusconi til Gaddafi nýlega.