Heiðra Ómar með barnaplötu

Félagarnir Gunni og Felix gefa út barnaplötu til heiðurs Ómari Ragnarssyni í tilefni af stórafmæli hans. Platan samanstendur af þrettán lögum Ómars sem félögunum fannst nauðsynlegt að kynna fyrir nýrri kynslóð.

„Við erum óskaplega ánægðir með plötuna. Ómar hefur glatt þjóðina og þá börn sérstaklega í um fimmtíu ár. Hann var númer eitt á listanum þegar við Gunni leituðum að okkar fyrirmynd þegar við byrjuðum með Stundina okkar. Því lá það beint við að fá að heiðra hann í kringum þennan stóra dag,“ segir Felix Bergsson.

Félagarnir Felix og Gunnar Helgason, tvíeykið Gunni og Felix, ætla að heiðra Ómar Ragnarsson í tilefni af sjötugsafmæli hans nú í ár. Gera þeir það með því að senda frá sér barnaplötu með vel völdum lögum af öllum þeim frábæru barnalögum sem Ómar á. Diskurinn heitir Ligga ligga lá – Gunni og Felix flytja lög Ómars Ragnarssonar og eru á honum þrettán lög.

„Ómar á lög eins og til dæmis Hláturinn lengi lifi, Jói útherji, Þrjú hjól undir bílnum og Ligga ligga lá, sem fá mestu fýlupúka til að brosa út í annað,“ segir Felix. „Foreldrarnir þekkja þessi lög frá því að þeir voru ungir og því tilvalið að fjölskyldan fái lög sem hún geti sungið saman.“

Félagarnir vildu endurvekja lög Ómars svo að börn dagsins í dag fengju að njóta þeirra gullmola sem hann hefur búið til.

Plötuna unnu þeir með góðvini sínum, Jóni Ólafssyni. En Jón hefur unnið með þeim félögunum í öll þau sextán ár sem þeirra samstarf hefur varað. Einnig koma þeir Hjörleifur Valsson, Stefán Már Magnússon og Haukur Gröndal að plötunni. Ómar sjálfur kemur aðeins við sögu í einu laganna þar sem hann leikur bæði sjálfan sig og forsætisráðherrann Jóhönnu Sigurðardóttir.

„Það var eins og að ná í páfann þegar við reyndum að fá hann til að koma í stúdíó,“ segir Felix. „Hann er alltaf úti um allt með fulla dagskrá að það var eiginlega ekki möguleiki að fá hann til að koma. Hann er ótrúlega ofvirkur og ef hann væri tíu ára væri hann á lyfjum. Hann er svo stórkostlegur einstaklingur!“

Eins og þjóðin veit slógu þeir félagar Gunni og Felix í gegn í Stundinni okkar fyrir fimmtán árum. Þeir hafa þó enn ekki hætt að skemmta börnum.

linda@frettabladid.is