Danskur auðmannabanki óskar eftir greiðslustöðvun

Í frétt um málið í Jyllands Posten segir að upphaflega hafi Capinordic fengið frest hjá fjármálaeftirlitinu til 3. febrúar s.l. til að koma eiginfjárhlutfalli sínu í lag. Sá frestur var síðan framlengdur til í dag.

Á meðan á frestinum stóð reyndi Capinordic ákaft að útvega það fjármagn sem til þurfti en án árangurs. Þrátt fyrir beiðni um greiðslustöðvun telur stjórn bankans að eigið fé hans dugi fyrir útistandandi skuldbindingum að því er segir í tilkynningu um málið.

Fyrir utan að geta ekki uppfyllt kröfur um eiginfjárhlutfall er allt útlit fyrir að Capinordic muni sýna tap upp á 1.275 til 1.375 milljón danskrar kr. fyrir árið í fyrra. Þetta er snöggtum meira tap en stjórn bankans greindi fjárfestum sínum frá í síðasta mánuði. Þá lágu tölurnar um tapið á bilinu 140 til 170 milljónir danskra kr.

Frá því í morgun hafa hlutabréf í Capinordic hrapað á markaðinum í Kaupmannahöfn. Nú skömmu fyrir lokun markaðarins hafði gengi þeirra lækkað um rúmt 21%.