Níu sigrar í röð hjá Akureyri - myndir

Topplið Akureyrar hélt sigurgöngu sinni áfram í N1 deild karla í gærkvöldi með 25-24 sigri á Aftureldingu í Mosfellsbænum. Akureyri hefur nú fjögurra stiga forskot á toppi deildarinnar en norðanmenn eru búnir að vinn fyrstu níu leiki sína í N1 deildinni.

Akureyri hefur unnið tvo síðustu leiki sína með eins marks mun þannig að það hefur ekki mátt muna miklu að liðið tapaði sínum fyrstu stigum á tímabilinu en strákarnir hans Atla Hilmarssonar hafa klárað báða leiki og eru því áfram með fullt hús.

Stefán Karlsson, ljósmyndari Fréttablaðsins og Vísis, var á leiknum að Varmá í gærkvöldi. Myndirnar má sjá í albúminu hér að neðan. Hægt er að sjá myndirnar stærri með því að smella á þær.