Fimm tonn af fiski til ESB gætu þurft 1875 vottorð

4. desember 2009 13:50

Norskir útflytjendur standa nú frammi fyrir því að útflutningur á óverulegu magni af fiski getur kallað á gríðarlegt flóð vottorða vegna hertra reglna Evrópusambandsins til þess að stemma stigu við ólöglegum fiskveiðum. Reglugerð þar að lútandi tekur gildi þann 1. janúar næstkomandi. Eftir breytinguna eru dæmi um að framvísa gæti þurft 1875 upprunavottorðum vegna útflutnings fimm tonna af blönduðum fiski frá Noregi til kaupanda í Þýskalandi.

Fjallað er um málið á vefsíðu LÍÚ en þetta kemur fram í frétt vefmiðilsins IntraFish í morgun, þar sem rætt er við þá Matthias Keller, framkvæmdastjóra samtaka fiskvinnslustöðva í Þýskalandi og Jurgen Meinert, framkvæmdastjóra samtaka framleiðenda sjávarafurða í Noregi. Meinert segir breytingarnar kalla á „pappírsflóð" og Keller segir það orðið augljóst að ógerningur sé að uppfylla þær kröfur sem ætlað er að ná fram með breytingunum.

Þeir setja fram dæmi í fréttinni um kaupanda í Þýskalandi sem kaupir blöndu fimm fisktegunda (þorsk, ýsu, ufsa, karfa og skötusel) af fimm útflytjendum í Noregi - eitt tonn frá hverjum - en þeir aftur kaupa fiskinn frá fimm mismunandi framleiðendum. Til þess að uppfylla öll skilyrði um innflutning til ESB þarf 1875 upprunavottorð (Catch Certificates) með þessum fimm tonnum af fiski.

Öll vottorðin þarf að prenta út, stimpla og undirrita áður en skanna þarf þau inn og senda með tölvupósti til kaupandans. Hann þarf síðan að prenta vottorðin 1875 út að nýju, stimpla þau og undirrita áður en hann skannar þau inn aftur og sendir þar til bærum eftirlitsaðila í Þýskalandi með tölvupósti. Þar verða skjölin prentuð út í þriðja sinn, stimpluð og undirrituð.

Samkvæmt tilkynningu frá sjávarútvegsráðuneytinu í dag hafa íslensk stjórnvöld óskað eftir upplýsingum frá framkvæmdastjórn ESB um um hvernig framkvæmd umræddrar reglugerðar ESB, nr. 1005/2008 um varnir gegn ólöglegum veiðum, verður háttað í aðildarríkjum sambandsins.