Fiat verði einn stærsti bílaframleiðandi heims

Ítalski bílaframleiðandinn Fiat stefnir að því að koma á einni stærstu bílaverksmiðju heims. Fiat reynir nú að kaupa rekstur bandaríska bílarisans General Motors í Evrópu eftir að hafa ná samning um yfirtöku á gjaldþrota risanum Chrysler.

- Í síðustu viku var samið um að Fiat taka yfir meirihluta í bandaríska bílaframleiðandanum Chrysler sem óskaði þá eftir gjaldþrotavernd. Fiat fær fyrst tuttugu prósenta hlut í Chrysler og eignast síðan meirihluta í félaginu eftir að búið er að borga til baka neyðarlán frá bandaríska ríkinu.

Nú horfa stjórnendur ítalska fyrirtækisins til evrópska reksturs General Motors sem þeir vilja kaupa. Þar með myndi Fiat eignast Vauxhall verksmiðjurnar í Bretlandi með fimm þúsund starfsmenn og Opel bílaverksmiðjurnar í Þýskalandi með tuttugu og sex þúsund starfsmenn. Ekki er talið að sænsku Saab verksmiðjurnar séu þar með en þær tilheyra einnig General Motors í Evrópu. Endurskipulagning Saab er í gangi og hún samkvæmt sænskum lögum.

Talsmaður General Motors vill ekkert gefa upp um viðræður við Fiat, segir aðeins að nú standi yfir viðræður við fjölmarga mögulega fjárfesta.

Framkvæmdastjóri Fiat fundar í dag með stjórnendum Opel í Berlín til að ræða möguleg kaup. Ekkert er þó í höfn því fleiri eru um hituna.

En fái Fiat Opel munu stjórnendur ítalska bílaframleiðandans ætla að sameina sinn kjarnarekstur við Chrysler og evrópuhluta General Motors í nýtt fyrirtæki sem yrði skráð á markað líklegast undir nafninu Fiat/Opel. Það yrði einn stærsti bílaframleiðandi í heimi.

Áætlað hefur verið að nýja fyrirtækið muni velta um 100 milljörðum dollara á ári, jafnvirði um 12.700 milljarða króna, og selja á bilinu sex til sjö milljónir bíla.

Verð á bréfum í Fiat hefur hækkað í morgun vegna frétta af áformunum.