Bresk bæjar- og sveitarfélög saka slitastjórn Glitnis um lögbrot

Fulltrúar frá sambandi breskra bæjar- og sveitarfélaga (LGA) eru nú staddir hérlendis á fundi með slitastjórn Glitnis. Richard Kemp varaforseti LGA segir það lögbrot að slitastjórn Glitnis hafi ákveðið að kröfur félaganna á hendur Glitni voru skilgreindar sem almennar kröfur en ekki forgangskröfur.

Þetta kom fram í viðtali við Kemp á útvarpsstöðinni BBC Radio 4 áður en hann og fleiri fulltrúar frá LGA héldu til Íslands. Í viðtalinu segir Kemp að þeir vilji fá..."hvert einasta penný til baka fyrir breska skattgreiðendur."

Nokkur umfjöllun er í breskum fjölmiðlum í morgun vegna heimsóknar fulltrúa LGA til Íslands en þeir ætla að reyna að sannfæra slitastjórnina um að kröfur þeirra eigi að vera forgangskröfur.

Alls áttu bresk bæjar- og sveitarfélög auk fjölda opinberra stofnanna um 900 milljónir punda inn á reikningum íslensku bankanna í Bretlandi þegar þeir hrundu í fyrrahaust. Af þeirri upphæð voru um 200 milljónir punda inn á reikningum Glitnis.

Fram kemur í blaðinu Independent að íslensku bankarnir, fyrir utan Glitni, hafi tjáð fyrrgreindum kröfuhöfum að þeir muni fá innistæður sínar greiddar að fullu. Hinsvegar muni innistæðueigendur hjá Glitni ekki fá nema um fjórðung af fé sínu til baka eins og staðan er núna.