Uppgjör útrásarvíkinga í Svíþjóð - 288 milljarðar horfnir

Í ársbyrjun 2008 áttu íslensku útrásarvíkingarnir ráðandi hluti í sænskum fyrirtækjum og félögum sem metnir voru á 18 milljarða sænskra kr. eða 288 milljarða kr. Í dag er þetta allt horfið eða „gufað upp" eins og það er orðað í úttekt sænska tímaritsins Veckans Affärer.

Úttektin hefur verið birt á vefsíðu tímaritsins va.se. Þar segir að Íslendingunum, sem voru ekki nema sex talsins, hafi tekist á afar skömmum tíma að koma sér í stóra stöðu í sænsku viðskiptalífi með áhættusækni sinni. Þeir hafi byrjað smátt með litlum stöðum í félögum á borð við verðbréfamiðlunina D Carnegie .

Það leið þó ekki á löngu þar til Íslendingarnir voru búnir að byggja upp, að vísu að mestu með lánum, stöðu sem nam 18 milljörðum sænskra kr. Sem dæmi um eignirnar nefnir va.se Intrum Justitia, Nordea, Carnegie, Invik, Ticket, JP Nordiska sem síðar varð Kaupþing Svergie, sænska hlutann af Milestone (Moderna) og Glitni.

Landsbankinn var einnig umfangsmikill í Svíþjóð á tímabili með eignarhluti í t.d. Investor, Ericsson, Lundin Petroleum og SEB. Samtals námu eignir bankans 1,2 milljörðum sænskra kr. þegar best lét.

Tímaritið ræðir við Jan Fock sem var forstjóri dótturfélags Kaupþings í Svíþjóð. Hann ber Íslendingunum vel söguna og segir þá hafa verið gáfaða menn en ekki skúrka eins og fjölmiðlar hafi gjarnan gefið í skyn. „Þeir tóku hlutina alvarlega en voru hinsvegar mun áhættusæknari en Svíar eiga að venjast," segir Fock.

Tímaritið ræðir einnig við Pálma Haraldsson sem er nokkuð brattur þrátt fyrir að félag hans, Fons, sé orðið gjaldþrota. „Ég held að við komumst út úr þessu á réttum kili," segir Pálmi. „Ísland kemst aftur á lappirnar."

Hér má svo bæta við að fyrrgreindir 288 milljarðar eru ekki alveg horfnir. Skilanefnd Kaupþings hefur greint frá því að eignasala bankans í Svíþjóð hafi hingað til skilað 135 milljörðum í hús.