SuperBest í Danmörku seldi 120.000 flöskur af fölsku víni

Dagvörukeðjan SuperBest hefur síðan 2007 selt um 120.000 flöskur af fölsku rauðvíni. Í ljós hefur komið að hin dýru ítölsku rauðvín Amarone voru blönduð með ódýrum frönskum borðvínum áður en tappað var á flöskurnar á Ítalíu.

Í fréttum um málið í dönskum fjölmiðlum í morgun segir að svikin hafi komið í ljós í september s.l. þegar ítalska lögreglan efndi til umfangsmikilla aðgerða gegn víngarðinum Amarone. Þar var lagt hald á 1,2 milljónir flaska af rauðvíni en í ljós kom að 60% af innihaldi þeirra voru ódýr frönsk borðvín.

Gobi Vin sem flutt hefur Amarone vínin inn fyrir SuperBest hefur sett lögfræðing í málið.

„Ég hef orðið fyrir áfalli. Þetta er versta upplifun mín á öllum starfsferlinum," segir Peter Sick forstjóri SuperBest í samtali við B.T. „Við erum afskaplega leið yfir því að hafa blekkt viðskiptavini okkar með þessum hætti."

Sick bætir því við að svindl sem þetta, að hella ódýrum vínum á dýrar flöskur, sé því miður alltof algengt meðal vínframleiðenda. SuperBest, sem rekur 220 verslanir í Danmörku, hefur endursent 30.000 flöskur af víninu Castello Venezi Amarone.

SuperBest hefur látið þau boð út ganga að allir sem hafa keypt Amarone vín hjá keðjunni undanfarin tvö ár geti fengið þau endurgreidd.