ÍR er búið að vekja okkur aftur

Magnús Þór Gunnarsson, fyrirliði Keflavíkur, segir hans menn óhressa með frammistöðu sína eftir fyrsta leikinn við ÍR og gaf í dag út aðvörun til andstæðinga liðsins í samtali við Vísi.

ÍR hefur komið nokkuð á óvart í úrslitakeppni Iceland Express deildarinnar og fylgdi eftir sigrinum á Íslandsmeisturum KR með því að vinna Keflvíkinga í fyrsta leik liðanna í undanúrslitaeinvíginu á dögunum.

Magnús Þór var vitanlega ekki kátur með tapið og að vera búinn að missa heimavallarréttinn yfir til Breiðhyltinga.

"Það voru bara lykilmenn í liðinu sem mættu ekki til leiks og þar er ég meðtalinn. Það auðvitað gengur ekki í svona leik. Þó við séum með gott lið, verðum við allir að spila vel til að vinna. Þetta gerðist sem betur fer í fyrsta leik og það er nóg eftir af þessu einvígi. Við þessir sem gátum ekki neitt í fyrsta leiknum verðum bara betri í kvöld - við verðum allir góðir í kvöld," sagði Magnús ákveðinn í samtali við Vísi.

Við spurðum Magnús hvort lið ÍR hefði komið Keflvíkingum á óvart með leik sínum. "Ég get nú ekki sagt það, við þekkjum þessa stráka vel, en ég held að við höfum meira komið okkur sjálfum á óvart með það hvað við vorum lélegir. Það sannaðist að ef menn mæta ekki tilbúnir í þetta, þá bara tapa þeir. En við ætlum að leiðrétta það í kvöld," sagði Magnús.

Hann vill meina að pressan sé enn á ÍR þó liðið hafi náð að landa sigri í fyrsta leiknum.

"Þeir verða auðvitað að vinna í kvöld, því ef þeir gera það ekki erum við komnir aftur með heimavallarréttinn. Ég get líka lofað því að við töpum ekki öðrum leik í Keflavík í þessari úrslitakeppni. Það kemur ekkert lið til Keflavíkur og vinnur og heldur að það komist upp með það. Þeir vöktu okkur með svipuðum hætti í úrslitakeppninni árið 2005 og nú eru þeir búnir að gera það aftur," sagði Magnús.

Þegar pressað var á Magnús fékkst hann til að viðurkenna að frammistaða ÍR í úrslitakeppninni hefði komið sér nokkuð á óvart. "Já, ég held að þeir hafi komið flestum nokkuð á óvart nema kannski sjálfum sér. Þeir spiluðu vel á móti KR og börðust vel. Þeir hafa tví sem þeir eru að gera. KR reyndar spilaði ekki vel á móti þeim í þriðja leiknum, rétt eins og við á móti þeim síðast, en á meðan voru þeir að hitta á góða leiki."

Annar leikur ÍR og Keflavíkur fer fram í Seljaskóla í kvöld og hefst klukkan 19:15.