Sílspikað í Hafnarhúsinu

Spikfeitt tónlistarkvöld bíður gesta á Airwaves í kvöld og eflaust verður sílspikaðasta upplifunin á Listasafni Reykjavíkur. Þar spila þrjár áhugaverðar erlendar sveitir í beit.

Kvöldið hefst á íslenska rafgúrúinum Biogen kl. 19, en kl. 20.15 er komið að hljómsveitinni The Mae Shi. Þetta er sex manna band frá Los Angeles. Músíkin er tilraunakennt, sýrulegið og melódískt rafrokk, útkoman ekki ósvipuð og ef hljómsveitirnar Deerhoof, Led Zeppelin og Flaming Lips hefðu ákveðið að sameinast. Nýjasta platan heitir HLLYH og fékk 9 af 10 í einkunn fyrr á árinu í NME.

Næst er enska hljómsveitin Florence & The Machine kl. 21. Þar fer fremst í flokki 21 árs söngkona að nafni Florence Welch. Hún var uppgötvuð við að syngja inni á klósetti í partíi fyrir 18 mánuðum en er nú ein af þeim efnilegustu í bransanum. Hetjurnar hennar eru Patti Smith, Kate Bush og Björk, og hún hljómar ekki ósvipað og PJ Harvey á fyrsta tímabili ferils hennar. Bæði The Mae Shi og Florence eru gefin út af enska merkinu Moshi Moshi, sem hefur lengi verið viðloðandi Airwaves.

Næst koma aðrir Bretar, dúettinn Fuck Buttons kl. 21.45. Samfarahnapparnir hafa vakið mikla lukku fyrir fyrsta albúmið sitt, Street Horrrsing, sem kom út á þessu ári. Þar rís og hnígur transvekjandi og fallegur rafhávaðaniður sem fær mestu karlmenni til að verða lina inni í sér. Tónleikar dúettsins þykja mikilfenglegir svo vissara er að mæta með vasaklút.

Eðalmennin í Gus Gus klára svo kvöldið á nautnafullu sjói og fara á svið kl. 22.45.- drg