Semur í göngutúrum

Hljómsveitin Vetiver heldur tónleika á Organ í kvöld. Andy Cabric, forsprakki sveitarinnar, er spenntur fyrir tónleikunum.

Vetiver er frá San Francisco og hefur verið ein af leiðandi hljómsveitum hinnar svokölluðu „freak-folk“ senu en innan hennar teljast nöfn á borð við CocoRosie, Six Organs of Admittance og Joanna Newsom. Andy Cabic, forsprakki Vetiver, er mikill vinur Devendra Banhart og hafa þeir gárungar unnið mikið saman. Cabic hefur meðal annars samið lög fyrir Devendra og tók einnig upp síðustu plötu hans.

Í samtali við blaðamann Fréttablaðsins segir Andy að rætur „freak-folk“ senunnur liggi að mestu innan Kaliforníu en sjálfur segir Andy að hann leiti mun meira til Velvet Underground og sveim- og draumkenndra sveita 10. áratugarins á Bretlandi. Því til sönnunar má nefna að Hope Sandoval, söngkona Mazzy Star, og Colm O‘Ciosoig, trommari My Bloody Valentine, komu bæði við sögu á frumburði Vetiver.

Andy segir að allt tónlistarlegt landslag í San Francisco sé einkar þægilegt og að borgin sé vafalaust sú evrópskasta af borgum Bandaríkjanna. „Ég held samt að allt sem ég geri í sambandi við tónlist sé að mestu innhverft og hafi lítið að gera með staðinn sem ég bý á. Nema kannski að ég geng um borgina þegar ég sem textana mína. Öll mín lög byrja þannig á göngutúr út í almenningsgarð.“

Andy og aðrir úr Vetiver vinna nú að nýrri plötu og hefur Andy einnig verið að vinna að plötu með ábreiðulögum. „Við munum pottþétt spila eitthvað af þessum lögum,“ útskýrir Andy, en af rödd hans að dæma iðar hann í skinninu af tilhlökkun yfir að koma til Íslands. Tónleikar Vetiver hefjast stundvíslega klukkan 22.00 og kostar 1.500 krónur inn en Lights on the Highway og My Summer as a Salvation Soldier sjá um upphitun.