Ókeypis háhraða nettenging á veitinga- og kaffihúsum

Notkun á Heitum reitum, þráðlausri nettengingu á veitingastöðum og kaffihúsum, frá Og Vodafone hefur vaxið verulega síðustu mánuði. Sótt gagnamagn á þeim stöðum sem bjóða þráðlausa háhraðarengingu frá Og Vodafone hefur aukist um 40% á hálfu ári, frá því í ágúst 2005 til lok janúar á þessu ári.

Í Heitum reitum, sem er notendum að kostnaðarlausu, felst öll algeng netþjónusta. Má þar nefna vefráp, tölvupóst og MSN. Þá er hægt að tengjast vinnustöðum og skólanetum um vinnuhlið. Þeir staðir sem bjóða upp á Heita reiti eru sérmerktir. Þar má nálgast leiðbeiningar um hvernig þráðlaus nettenging er notuð.

„Vinsældir Heitra reita hafa aukist stöðugt á liðnum mánuðum, eða frá því í byrjun ágúst," segir Gísli Þorsteinsson hjá Og Vodafone. „Gera má ráð fyrir því að nokkrar ástæður liggi þar að baki. Ein er sú að notkun eykst yfir vetrartímann í kringum skólastarf en nemendur eru iðnir að notfæra sér Heita reiti á opinberum stöðum. Þá hefur veitingastöðum og kaffihúsum, sem bjóða viðskiptavinum sínum upp á þráðlaust net, fjölgað. Slíkir staðir eru nú í kringum 60; í Reykjanesbæ, Sauðárkróki og á Akureyri." Gísli segir ennfremur að notkunin hafi aukist eftir að Og Vodafone opnaði Heitan reit í verslunarmiðstöðinni Kringlunni síðla síðasta sumars. „Í Kringlunni geta viðskiptavinir notfært sér þjónustuna á almennum svæðum og veitingastöðum, eða í kringum 20 þúsund fermetrum."

Og Vodafone tók sína fyrstu Heitu reiti í notkun í kringum eins árs afmæli fyrirtækisins árið 2004. Þjónustan er aðallega vinsæl hjá námsfólki og starfsfólki fyrirtækja sem vill eiga þess kost á því að komast í nýtt umhverfi fjarri skólum, bókasöfnum og vinnustöðum eða slaka á og njóta afþreyingar á Internetinu.

Sjá upplýsingar um staði sem bjóða Heita reiti á ogvodafone.is